Presidenti i Republikës, Ilir Meta nderoi, me anë të një ceremonie solemne, pesë veprimtarë të shquar atdhetarë nga Nishi, Medvegja, Presheva dhe Bujanovci, për kontributet e tyre të shquara patriotike për mbrojtjen e çështjes shqiptare dhe lartësimin e vlerave tona më të mira kombëtare.

Me “Dekoratën e Artë të Shqiponjës”, Kryetari i Shtetit vlerësoi Ridvan Qazimin (pas vdekjes), me motivacionin: “Me nderim dhe respekt të veçantë për jetën, veprën e paharruar dhe kontributet e çmuara atdhetare si luftëtar i orëve të para për liri në Luginën e Preshevës, dhe si organizator, prijës dhe frymëzues në rrugën e lirisë dhe fitimit të drejtave të pamohueshme të shqiptarëve”.

Me Dekoratën “Nderi i Kombit” u nderua profesori Ahmet Gashi (pas vdekjes) “Në vlerësim të lartë shtetëror për jetën dhe veprën e tij voluminoze intelektuale dhe atdhetare në shërbim të shqiptarizmës. Me mirënjohje për kontributet e çmuara si mësues i paharruar, studiues i mirëfilltë dhe shkencëtar i rrallë gjeografie, i cili ruajti me fanatizëm, pasuroi ndjeshëm dhe u transmetoi me atdhedashuri dhe përpikëri brezave të panumërt në të gjitha trevat e banuara prej shqiptarëve, jo vetëm dijet e tij të kalibrit botëror, por edhe hartën e paçmuar ‘Shqipnija e Vërtetë.’”;

Me Titullin “Kalorës i Urdhrit të Skënderbeut” Presidenti Meta çmoi Ibrahim Kelmendin (pas vdekjes) “Me mirënjohje për kontributin e jashtëzakonshëm në organizimin e rezistencës së popullit tonë gjatë Luftës së Dytë Botërore; për ruajtjen e qenies dhe identitetit tonë kombëtar në Luginën e Preshevës, si dhe për kontributin e çmuar të dhënë në fushën e arsimit dhe të ndriçimit të historisë sonë kombëtare.”;

si dhe Llukman Halilin (pas vdekjes) “Në vlerësim të jetës dhe veprës së tij atdhetare shumëvjeçare si dhe me mirënjohje ndaj kontributeve të vyera intelektuale si gazetar profesionist, politolog, studiues dhe publicist, i cili nuk reshti së pasqyruari me vërtetësi dhe paanshmëri ngjarjet e rëndësishme dhe vendimtare historike të dekadave të fundit, që përcaktuan fatet e kombit shqiptar në të dyja anët e kufirit dhe në të gjitha trevat e banuara nga shqiptarët”.

Ndërsa me Titullin “Naim Frashëri” Kreu i Shtetit dekoroi Bafti Krasniqin (pas vdekjes): “Me mirënjohje për jetën dhe veprën e tij atdhetare, si mësues dhe aktivist i palodhur, i cili u përpoq pareshtur për arsimin shqip, ruajti me besnikëri, pasuroi pa u lodhur dhe u mëkoi me dashuri brezave të tërë shqiptarësh gjuhën tonë të bukur amtare si dhe virtytet më të mira të kombit shqiptar në trevën e Komunës së Medvegjës”.

Në fjalën e rastit drejtuar familjarëve të personaliteteve të vlerësuara dhe të pranishmëve të shumtë nga Lugina, Presidenti Meta u shpreh se Këto personalitete kanë lënë gjurmë të pashlyera në historinë, kulturën, shkencën dhe trashëgiminë e kombit tonë.

Postimi i Plotë i Presidentit Meta

Mikprita vëllazërisht dhjetëra bashkëatdhetarë nga Nishi, Medvegja, Presheva, Bujanovci dhe Kosova, për të marrë pjesë së bashku, në një ceremoni domethënëse dhe tepër të veçantë, të vlerësimit të pesë personaliteteve të paharruara të këtyre trevave, që aq shumë kanë vuajtur dhe po aq shumë kanë dhënë për mbrojtjen e çështjes kombëtare.

I lumtur të nderoja Profesorin e ndjerë Ahmet Gashi, luftëtarin e orëve të para për liri, dije, arsimim dhe emancipim të kombit, këshilltarin e Isa Boletinit dhe bashkëveprimtarin e vëllezërve Frashëri dhe shumë patriotëve e rilindasve të tjerë të asaj periudhe.

Një vlerësim të merituar bëra edhe për Profesor Ibrahim Kelmendin, udhëheqësin e lëvizjeve të vitit ’44 për mbrojtjen e popullatës shqiptare në Kosovë nga masakrat sllavo-komuniste, historianin dhe shkencëtarin e rrallë, që me dinjitet mbrojti në veprat e tij prejardhjen ilire të shqiptarëve nën ish-Jugosllavi.

Një tjetër figurë të shquar, që nderova është Bafti Krasniqi, mësuesi shumë i dashur nga Medvegja, me kontribut të shquar për mbrojtjen e gjuhës shqipe, ngritjen e vetëdijes dhe ruajtjen e identitetit kombëtar shqiptar në Luginë, veçanërisht duke penguar politikat agresive asimiluese.
Ridvan Qazimi, apo siç hyri në histori, Komandant Lleshi, është njëri nga Dëshmorët e Kombit, që nderova gjithashtu, i cili krah Ushtrisë Çlirimtare të Kosovës sakrifikoi jetën e tij për kauzën shqiptare dhe sensibilizimin e faktorit ndërkombëtar për të drejtat e mohuara dhe shtypjen e papranueshme të shqiptarëve në Preshevë, Bujanovc e Medvegjë.

Pata kënaqësinë ta vlerësoj edhe gazetarin dhe intelektualin e mirënjohur nga Kosova, Llukman Halili, i cili me profesionalizmin dhe veprimtarinë e gjerë publicistike e atdhetare, frymëzoi brezat e rinj të gazetarëve se si duhet të punohet me përkushtim për të vërtetën dhe të mirën e kombit.
Është në nderin tonë të kujtojmë, nderojmë dhe vlerësojmë të gjitha ato personalitete, të cilat bënë të mundur, që kombi ynë të mbijetojë dhe të ndihet krenar për arritjet e tij.