Kandidatja e PD për bashkinë e Krujës, Merita Bakiu u shpreh sot se, “është koha të shohim njëri-tjetrin e të themi cila është më e mira për Krujën”.

Ajo parashtroi programin e saj ku thekson se, “Bashkia e Krujës duhet të jetë e hapur, në shërbim të qytetarëve dhe të ketë vullnetin për të hartuar strategji për t’u forcuar ekonomikisht”.
“Kruja ka nevojë për shumë menaxhim e pak politikë”, tha Bakiu.

Sipas saj, “krutanët u lodhën me pamje 3-D të qendrës së qytetit, ku e thënë dhe sipas specialistëve të fushës, ky projekt, jo vetëm nuk i shërbeu komunitetit, por humbi dhe identitetin e qytetit”.

Ajo falënderoi shtetin austriak e zvicerian që pas nëntë vitesh vunë në funksion Pallatin e Kulturës.
“Se çfarë është bërë për Krujën këto 10 vite e shjegon qartë shpopullimi i qytetit, biznesi i vogël që mbyllet dita-ditës dhe biznesi i madh që është në krizë për fuqi punëtore”, tha ajo.

“Politikat e qeverisë socialiste i hoqën qytetit të Krujës të gjitha zyrat e shërbimeve duke shtuar edhe më shumë lodhjen fizike e kostot financiare tek njerëzit për të marrë shërbimet. Kruja është larg vëmëndjes së qeverisë. Ndaj ftoj votuesit e Bashkisë Krujë, më 14 maj të jemi të gjithë bashkë të votojmë për ta kthyer Bashkinë në shërbim të qytetarëve”, u shpreh Bakiu.