Presidenti Bajram Begaj do të niset nesër drejt Podgoricës, për të marrë pjesë në ceremonitë e parashikuara me rastin e inaugurimit të presidentit të ri të Malit të Zi, Jakov Milatoviç.

Presidenca njoftoi sot se prania e Presidentit Begaj në këto ceremoni është tregues i vullnetit për forcimin e mëtejshëm të fqinjësisë së mirë si dhe vlerësim për rolin e faktorit shqiptar në stabilitetin dhe rrugëtimin euroatlantik të Malit të Zi.

Në këto ceremoni pritet të marrin pjesë një sërë krerë shtetesh dhe qeverish nga vendet e rajonit të Evropës Juglindore, si dhe shumë zyrtarë të lartë evropianë dhe amerikanë.

Ekonomisti Jakov Milatoviç fitoi zgjedhjet presidenciale në Mal të Zi në fillim të prillit.