Shqipëria dhe Mali i Zi rinovuan sot marrëveshjen e bashkëpunimit dhe protokollin e aktiviteteve shkencore të përbashkëta (2024-2025).

Marrëveshja u nënshkrua mes kryetarit të Akademisë së Shkencave të Shqipërisë, Skënder Gjinushi si dhe kreu i Akademisë së Shkencave dhe të Arteve të Malit të Zi, Dragan K. Vukčević.

Akad. Skënder Gjinushi theksoi se rinovimi i marrëveshjes dhe i protokollit të aktiviteteve të përbashkëta që po firmoset sot për bashkëpunimin e Akademisë së Shkencave të Shqipërisë me Akademinë e Shkencave dhe Arteve të Malit të Zi ka si qëllim bashkëpunimin në të gjitha fushat.

Ndiq "TiranaDiplomat.com" në Facebook

Marrëveshja ka si qëllim që të vazhdojë të zhvillohet tradita e bashkëpunimit të frytshëm kërkimor-shkencor mes dy akademive pas bisedimeve dhe shkëmbimit tё mendimeve pёr zhvillimin e mëtejshëm tё marrëdhënieve ndërinstitucionale e përforcuar dhe nga protokolli i aktiviteteve të përbashkëta.

Akad. Gjinushi vuri në dukje se për përforcimin e këtij bashkëpunimi , do të mbahet parasysh rëndësia e ndërmarrjes së nismave të përbashkëta shkencore nga të dyja palët, e shkëmbimit të kërkuesve, përvojave dhe informacionit shkencor, mbështetur në marrëveshjen-kuadër të nënshkruar ndërmjet dy akademive.

Akad. Dragan K. Vukčević tha se këtë marrëveshje e sheh si një urë bashkëpunimi mes dy akademive që të investohet mes dy shteteve në ato projekte që i shërbejnë bashkëpunimit rajonal dhe më gjerë në kuadër të zgjerimit të këtij bashkëpunimi me vendet e Bashkimit Europian.