Ministrja e Shtetit për Marrëdhëniet me Parlamentin, Elisa Spiropali uroi sot Papa Franceskun në ditën e lindjes.

Spiropali kujtoi se vizitën e parë në një vend evropian, më 21 shtator 2014, Papa Françesku e bëri në Shqipëri.

“Simbolikë më të bukur ungjillore nuk mund të kishte zgjedhur: vendi i vogël vizitohet i pari. Por njëherazi, kishte një tjetër simbolikë përvjetori: më 21 shtator 1953, 17-vjeçari Jorge Mario Bergoglio ndjen thirrjen e Hyut për t’u bërë meshtar”, u shpreh ajo.

“Në disa libra me intervista, më ka mrekulluar jeta e Tij me dedikim të plotë e të paskaj ndaj njerëzve në nevojë ku Ai sheh imazhin e Krishtit duke vuajtur! Një person, familja e të cilit kishte përjetuar emigrimin, vetë Ai kishte përjetuar diktaturën, lirinë, dashurinë, e zgjedhin Atin e Shenjtë e të papërsëritshëm në aradhën e Papëve”, vijoi Spiropali.

Spiropali kujton se kur studionte për një semestër në Buenos Aires në vitin 2004, e intervistonte njerëz që kishin vuajtur diktaturën e juntës ushtarake në Argjentinë, nuk e kishte menduar se ky vend i realizmit magjik e i Borgesit, një ditë do i dhuronte katolicizmit një Papë të jashtëzakonshëm që do të vetëquhej, sipas traditës, Françesk: nën shembullin e Shenjtit të madh të skamnorëve.

“I pranishëm me lutje kudo ku ka luftë, emigrantë në kërkim të një jete me dinjitet, ku ka skamje, ku ka lotë dhimbjeje! Ditëlindja e vërtetë e një meshtari është dita e thirrjes meshtarake prej Hyut, por sot po i përmbahem Kalendarit Gregorian: Gëzuar Ditëlindjen Ati i Shenjtë për dëshminë prekëse që po i jep botës në këto kohë të vështira, besimtarëve e jo besimtarëve, duke prekur zemrat e të gjithëve”, shkruan ajo.

(Marrë nga ATSH)