Kryeministri Edi Rama u prit sot në një takim në Madrid nga kryeministri i Spanjës, Pedro Sánchez, një ditë përpara pjesëmarrjes së Shqipërisë në panairin e madh global të turizmit “FITUR Madrid”.

Kryeministri Edi Rama nisi sot një vizitë pune dyditore në Spanjë me rastin e pjesëmarrjes së Shqipërisë në panairin gjigant të turizmit “FITUR, Madrid”.

Kryeministri Rama u mikprit nga kryeministri i Spanjës, Pedro Sanches në një takim kokë më kokë, në zyrën e tij në Madrid, takim që u pasua nga takimi i zgjeruar dypalësh mes dy delegacioneve.

Ndiq "TiranaDiplomat.com" në Facebook

Në përbërje të delegacionit që shoqëron Kryeministrin Rama janë ministrja e Turizmit dhe Mjedisit, Mirela Kumbaro si edhe disa nga kryetarët e bashkive të vendit tonë: kryetarja e bashkisë Durrës, Emiriana Sako, kryetari i bashkisë Lezhë, Pjerin Ndreu, kryetari i bashkisë Gjirokastër, Flamur Golemi dhe kryetari i bashkisë Sarandë Oltion Çaçi.

Ditën e nesërme, kryeministri Rama do të marrë pjesë në çeljen e Panairit Ndërkombëtar të Turizmit “FITUR 24” që do të bëhet nga Mbreti i Spanjës Felipe VI, ku do të prezantohet diversiteti i pasur turistik i vendit tonë, si një destinacion unik për t’u promovuar e vizituar.

Gjatë pjesëmarrjes në panair, Rama do të takohet me sipërmarrës dhe drejtues të kompanive prestigjioze botërore, si dhe përfaqësues të Organizatës Botërore të Turizmit.