Ministrja e Shëndetësisë dhe Mbrojtjes Sociale Albana Koçiu, së bashku me Të ngarkuarin me Punë të Ambasadës së SHBA, David Wisner, morën pjesë në ceremoninë e inaugurimit të Qendrës Kombëtare të Pritjes për Viktimat e Trafikimit, e cila që nga hapja e saj në vitin 2003 ka trajtuar dhe rehabilituar rreth 700 gra, vajza dhe fëmijë, viktima të trafikimit.

Kjo Qendër synon që viktimat e trafikimit, vajza dhe gra të marrin një profesion dhe të aftësohen për tregun e punës në mënyrë që të përballojnë një jetë dinjitoze pas rehabilitimit të tyre.

MSHMS vijon angazhimin e saj për zgjerimin e kapaciteteve për pritjen dhe rehabilitimin e viktimave të trafikimit duke ofruar shërbime të integruara psiko-social sipas standardeve europiane.

Qendra u ndërtua me mbështetjen financiare prej afro 500,000 dollarësh nga ushtria e Shteteve të Bashkuara dhe do të ofrojë strehim të sigurt, shërbime psikologjike dhe integrim në shoqëri për viktimat e trafikimit.

Gjatë ceremonisë, Wisner nënvizoi angazhimin e Shteteve të Bashkuara për partneritet me Shqipërinë në luftën kundër trafikimit të qenieve njerëzore dhe për të ndihmuar ata që kanë më shumë nevojë. (ATSH)