Në Tiranë u mbajt raundi i tretë i negociatave për dakordësimin e formularëve zbatues të marrëveshjes për sigurimet shoqërore ndërmjet Shqipërisë dhe Kroacisë.

Për palën shqiptare ato u drejtuan nga drejtore e Integrimit dhe Zbatimit të Marrëveshjeve me Jashtë, Loreta Shkëmbi, ndërsa për palën kroate nga ndihmësdrejtore, e Sektorit për Zbatimin e Rregulloreve të BE-së dhe Marrëveshjet e Sigurimeve Shoqërore, Antonija Krolo Vasilj.

Drejtori i Përgjithshëm i Institutit të Sigurimeve Shoqërore (ISSH), Astrit Hado bëri të ditur në një postim në rrjetet sociale se këto negociata u zhvilluan në frymën e plotë të bashkëpunimit.

Ndiq "TiranaDiplomat.com" në Facebook

Janë rreth 3 mijë shqiptarë, të cilët punojnë në këtë vend që përfitojnë nga njohja e viteve të punës dhe shërbimet e tjera që siguron zbatimi i marrëveshjes.

Marrëveshje e arritur u siguron qytetarëve të të dyja vendeve njohjen e ndërsjellë të kontributeve të sigurimeve shoqërore për përfitimin e pensioneve.

Mundëson koordinimin e skemave të sigurimeve shoqërore në përputhje me standardet e legjislacionit evropian, gjithashtu përfitimet e papunësisë, pagesat e barrëlindjes, përfitime në para në rastin e aksidenteve në punë, etj.

Janë mbi 3,000 shtetas shqiptarë, të cilët jetojnë e punojnë në Kroaci, që pritet të përfitojnë nga kjo marrëveshje.

Falë marrëveshjes, qytetarët nuk do të humbasin kontributet e paguara, pavarësisht se ku kanë punuar. Ajo bazohet në disa parime bazë si trajtimi i barabartë, ruajtja e të drejtave të arritura, bashkimi i periudhave të sigurimit, si dhe ofrimi i përfitimeve, brenda dhe jashtë shtetit të origjinës.

Kroacia i shtohet kështu një sërë shteteve të tjera, me të cilat tashmë Shqipëria ka finalizuar marrëveshjet për mbrojtjen shoqërore, që sigurojnë njohjen e ndërsjellë të kontributeve, si edhe lehtësojnë lëvizjen e qytetarëve sa i përket tregut të punës, në rajon e më gjerë.

(Marrë nga ATSH)