![](https://www.tiranadiplomat.com/wp-content/uploads/2024/06/sejki.jpg)
Anëtarësimi në SEPA, Sejko: Përfitime në fushat e tregtisë, turizmit, remitancave e investimeve direkte
Banka e Shqipërisë dorëzoi zyrtarisht aplikimin pranë Këshillit Evropian të Pagesave për anëtarësimin e Shqipërisë në SEPA
![](https://www.tiranadiplomat.com/wp-content/uploads/2024/06/sejki.jpg)
Dy ditë më parë, Banka e Shqipërisë dorëzoi zyrtarisht aplikimin pranë Këshillit Evropian të Pagesave për anëtarësimin e Shqipërisë në SEPA, duke u renditur vendi i parë në rajon që ka përmbyllur me sukses këtë fazë të rëndësishme të integrimit në tregun evropian të pagesave.
Guvernatori i Bankës së Shqipërisë, Gent Sejko deklaroi sot se përmes SEPA-s, qytetarët dhe bizneset shqiptare do të kryejnë pagesa dhe transferta sikur të ishin qytetarë të Bashkimit Evropian dhe anasjelltas.
“Përfitimet kryesore të ekonomisë shqiptare dhe familjeve do të jenë në fushat e tregtisë, turizmit, remitancave, investimeve direkte etj. Projeksionet janë që në afatmesëm ekonomia shqiptare do të përfitojë disa qindra milionë euro nga aderimi në SEPA”, u shpreh ai në workshopin “Rrugëtimi i Shqipërisë drejt integrimit në SEPA, përfshirjes dhe edukimit financiar”, që po mbahet sot në Tiranë.
Nga pikëpamja integruese e vendit, theksoi Guvernatori, anëtarësimi i përshpejtuar në SEPA garanton trajtimin e shtetasve shqiptarë në mënyrë të njëtrajtshme me ata evropianë në fushën e pagesave.
“Gjithashtu, ai garanton përputhshmërinë e tregut shqiptar të pagesave me legjislacionin dhe praktikat e Bashkimit Evropian për sa i përket Kapitullit 4 “Lëvizja e lirë të kapitalit”, duke kurorëzuar me sukses përpjekjet e vazhdueshme disavjeçare të Bankës së Shqipërisë si institucion përgjegjës për këtë kapitull”, nënvizoi Sejko.
Sipas tij, përmbushja e këtij objektivi shënon dhe një nga hapat e parë drejt realizimit të angazhimeve në kuadër të Planit të ri të Rritjes për Ballkanin Perëndimor, çka do të mundësojë përthithjen nga ana e Shqipërisë të fondeve të disponueshme dhe krijimin e një rruge më të qëndrueshme drejt anëtarësimit të vendit brenda vitit 2030, i cili është dhe objektivi i BSH.
Sejko u ndal dhe tek edukimi financiar, ku theksoi se në një ekonomi në zhvillim si Shqipëria, ku nivelet e kulturës financiare kanë qenë tradicionalisht të ulëta, puna në këtë drejtim mund të sjellë fryte të rëndësishme. Ai vuri në dukje se në sajë të iniciativave të saj, vërehet një rritje të ndjeshme të përfshirjes financiare.
“Bazuar në të dhënat zyrtare të Regjistrit Kombëtar të Llogarive rezulton se në vitin 2023, rreth 78% e popullsisë mbi 18 vjeç zotëron një llogari bankare dhe kjo shifër mund të arrijë deri në masën 85% nëse përfshihen dhe llogaritë e pagesave të ofruara nga institucionet e parasë elektronike. Rritja e përfshirjes financiare është shoqëruar edhe me rritjen e numrit të pagesave elektronike. Më konkretisht, në vitin 2023, numri i pagesave elektronike për frymë arriti në 21, nga rreth 4 pagesa për frymë në vitin 2017. Rritje të konsiderueshme kanë paraqitur pagesat me kartë duke arritur në 11 pagesa për frymë në vitin 2023, nga 5 pagesa për frymë që ishte ky tregues në vitin 2020”, tha ai. (ATSH)