15 muaj nga nisja e punimeve, nga sot aksi rrugor Thumanë-Kashar i kategorisë “A” do të jetë i kalueshëm për të gjitha mjetet.

Të pranishëm në ceremoninë e hapjes ishin kryeministri Edi Rama, zëvendëskryeministrja, njëherësh ministre e Infrastrukturës dhe Energjisë, Belinda Balluku dhe ministrja e Turizmit dhe Mjedisit, Mirela Kumbaro.

Kryeministri Rama bëri të ditur se të gjitha segmentet nga Muriqani deri në Vlorë brenda vitit 2030 do të jetë i përfunduar.

Ndiq "TiranaDiplomat.com" në Facebook

“Ky është vend ku gjithë ata që duan ta prekin me syrin e imagjinatës se si do të jetë Shqipëria 2030, duhet ta shohin sepse brenda kësaj periudhe e gjitha rruga nga Muriqani deri në Vlorë do të jetë në këtë standard. Ky është Korridori Blu”, u shpreh Rama.

Kryeministri po ashtu informoi se po punohet edhe për përfundimin brenda këtij afati edhe të Korridorit të 8, ndërsa theksoi se rruga Tiranë-Durrës do të bëhet me 4 korsi.

“Edhe korridori 8 do të jetë i përfundur. Ka shumë vëmendje për pjesën e rrugës Tiranë- Durrës dhe pjesën e rrugës së Ndroqit. Shumë shpejt do të nisë edhe ai projekt. Autostrada Tiranë-Durrës do të jetë me 4 korsi. Rruga e vjetër e Ndroqit do të kthehet në një rrugë turistike e do të mundësojë kalimin alternativ”, tha Rama.

Mjetet historike retro ishin edhe ato që inauguruan aksin e ri Thumanë-Kashar.

Aksi Thumanë-Kashar është një ndër akset më të rëndësishëm të Korridorit Blu, e do të pasohet me ndërtimin e segmenteve të tjera që janë pjesë e kësaj vepre.

Ky segment i paraprin tre kantiereve të reja Thumanë – Milot, Kashar – Lekaj dhe Lekaj – Fier.

Më hapjen e këtij aksi rrugor pritet të lehtësohet përfundimisht i gjithë trafiku që krijohet në autostradën e veriut apo problematika në Aeroportin e Rinasit.

Korridori Adriatiko-Jonian, ku bën pjesë edhe aksi Thumanë-Kashar, është pjesë e Korridorit TEN-T Mesdhetar dhe ka një gjatësi totale prej 1 550 km. 20% e gjatësisë së tij kalon në territorin shqiptar.