![](https://www.tiranadiplomat.com/wp-content/uploads/2024/07/gjykata.jpg)
Delegacioni i drejtësisë amerikane takim me gjyqtarët e Kushtetueses
Gjatë takimit u shkëmbyen mendime dhe përvoja lidhur me sistemet gjyqësore përkatëse, duke u fokusuar në sfidat me të cilat përballen gjyqtarët gjatë punës së tyre.
![](https://www.tiranadiplomat.com/wp-content/uploads/2024/07/gjykata.jpg)
Trupa e gjyqtarëve të Gjykatës Kushtetuese, e kryesuar nga Kryetarja e kësaj Gjykate, Holta Zaçaj, ka zhvilluar një takim me Trina Higgins, Prokurore e SHBA-së për Distriktin e Utah; Kryegjyqtarin Robert Shelby, nga Gjykata e Qarkut të Utah; dhe gjyqtaren Paige Petersen e Gjykatës së Lartë të Utah, të cilët po zhvillojnë një vizitë pune 5 ditore në Shqipëri. Delegacioni shoqërohej në këtë takim nga i Ngarkuari me Punë i Ambasadës së Shteteve të Bashkuara të Amerikës në Shqipëri, David Wisner, si dhe këshilltarët ligjorë, rezidentë në Ambasadë, Mary Kate Butterfield dhe David Backman.
Gjatë takimit u shkëmbyen mendime dhe përvoja lidhur me sistemet gjyqësore përkatëse, duke u fokusuar në sfidat me të cilat përballen gjyqtarët gjatë punës së tyre, për ta ushtruar këtë funksion me profesionalizëm dhe integritet të lartë, në mbrojtje të pavarësisë së pushtetit gjyqësor, demokracisë dhe sundimit të ligjit.
Kryetarja Holta Zaçaj nga ana e saj shprehu vlerësimin dhe mirënjohjen për partneritetin e vendosur me SHBA, si dhe vullnetin për konsolidimin e mëtejshëm të këtij partneriteti në të ardhmen, duke u fokusuar në mbështetjen e dhënë për zhvillimin dhe progresin e reformës gjithëpërfshirëse të sistemit të drejtësisë në Shqipëri. (ATSH)