![](https://www.tiranadiplomat.com/wp-content/uploads/2024/07/trump-vota.jpg)
Republikanët emërojnë Trumpin si kandidat presidencial
Trump njoftoi se kishte zgjedhur JD Vance, një senator nga Ohio, për të qenë kandidati i tij zëvendëspresident.
![](https://www.tiranadiplomat.com/wp-content/uploads/2024/07/trump-vota.jpg)
Partia Republikane e SHBA emëroi zyrtarisht Donald Trump si kandidatin e saj presidencial, në konventën e partisë së saj kombëtare në Miluoki, Uiskonsin.
Trump mori shumicën e nevojshme të votave të delegatëve në mbledhjen e partisë, e cila filloi vetëm dy ditë pas një tentative për vrasjen e Trump që tronditi vendin.
Delegatët janë anëtarë partie që dërgohen në kuvendin emërues nga të 50 shtetet dhe gjashtë territoret.
Bazuar në rezultatet e zgjedhjeve paraprake në shtetin ose territorin e tyre, ata deklarojnë zyrtarisht votat e tyre për kandidatin presidencial të partisë së tyre.
Pak më herët, Trump njoftoi se kishte zgjedhur JD Vance, një senator nga Ohio, për të qenë kandidati i tij zëvendëspresident.
“Kam vendosur që personi më i përshtatshëm për të marrë postin e zëvendëspresidentit të Shteteve të Bashkuara është senatori JD Vance, i shtetit të madh të Ohajos”, shkroi Trump në platformën e tij të mediave sociale ”Truth Social”.
Zgjedhjet presidenciale në SHBA do të mbahen më 5 nëntor dhe do të jenë një revansh mes Trump dhe presidentit aktual demokrat, Joe Biden.
Zëvendëspresidentja aktuale, Kamala Harris do të jetë sërish kandidatja e Bidenit.
(Marrë nga ATSH)