Ministri i Shtetit për Marrëdhëniet me Parlamentin, Taulant Balla shprehu sot angazhimin e qeverisë në përmbushjen e të gjitha rekomandimeve të Komisionit Evropian.

Në një takim të mbajtur në Tiranë me koordinatoret e ministrive dhe institucioneve të pavarura, Balla u shpreh se, deri në mars të vitit 2024, janë plotësuar më pak se 1/3-a e rekomandimeve të KE, duke shtuar se nevojitet koordinim më efikas mes institucioneve.

Balla ndau disa problematika të hasura deri tani, të cilat në këtë proces bazohen edhe në raportin e Komisionit Evropian për Shqipërinë të vitit 2024, sa i përket ecurisë së zbatimit të rekomandimeve.

“Komisioni Evropian vëren se e drejta e qytetarëve për një administratë të mirë duhet të forcohet edhe më tej.

Sipas të dhënave të ofruara për shembull nga Avokati i Popullit 23 nga 72 rekomandimet e dhëna për vitin 2023 ishin zbatuar plotësisht deri në mars të vitit 2024. Kjo përfaqëson një normë tek më pak se 1/3-a dhe duhet bërë më shumë për të përmirësuar shkallën e zbatimit”, tha Balla.

Ministri nënvizoi se, “nëse i referohemi raporteve të koordinatorëve, kjo shkallë zbatueshmërie varion, është e ndryshme dhe kjo mospërputhje që besoj që e vëmë re të gjithë vjen për shumë arsye ndër të cilat pa dyshim ka ndikuar mungesa e një koordinimi efikas mes institucioneve tona sa i përket zbatimit të rekomandimeve me impakt ndër-sektorial apo multidisiplinar dhe po ashtu mungesa e një metodologjie të standardizuar dhe të mirë përcaktuar të monitorimit të raportit me objektiva dhe afate të matshme për vlerësimin e ecurisë së zbatimit të rekomandimeve”.

Balla theksoi se, “asistenca tanimë e projektit PACEP për hartimin e një metodologjie të harmonizuar natyrshëm do të na krijojë bazat për standardizimin dhe harmonizimin e procesit të raportimit, për të garantuar një koordinim më efikas, një llogaridhënie më të lartë institucionale dhe në tërësi rezultate më të larta në kohë dhe cilësi sa i përket zbatimit të rekomandimeve të institucioneve të pavarura nga institucionet e administratës publike”.

Balla shprehu angazhimin e qeverisë për të vijuar me përmbushjen e të gjitha rekomandimeve si pjesë e pandalshme e procesit të negociatave me BE-në.

“Dua të shpreh angazhimin në emër të qeverisë shqiptare për të vijuar me përmbushjen e të gjitha rekomandimeve të lëna nga institucionet e pavarura si pjesë e pandalshme dhe e rëndësishme e procesit të integrimit evropian, të realizmit të kësaj aspirate historike për të gjithë shqiptarët”.

Balla tha se, të pranishëm në takim janë edhe përfaqësuesit e rrjetit të koordinatorëve që merren me ndjekjen e zbatueshmërisë së rekomandimeve.

“Është evidente që përmes këtij rrjeti të lehtësojmë komunikimin me ministrin e Shtetit për Marrëdhëniet me Parlamentin dhe ministritë e linjës dhe të arrijmë një qasje të duhur të koordinimit në mënyrë periodike për raportimin e zbatueshmërisë së rekomandimeve dhe të vendimeve të institucioneve të pavarura”, u shpreh ai.

“Deri tani mbi bazë vjetore ministri i Shtetit përmes këtij procesi komunikimi të vazhdueshëm me rrjetin e koordinatorëve ka evidentuar nivelin e angazhimit të deritanishëm të institucioneve shtetërore në lidhje me zbatimin e rekomandimeve që vijnë nga institucionet e pavarura”, tha Balla.

Më 15 tetor të këtij viti Shqipëria hapi grup-kapitujt e parë me Bashkimin Evropian, një moment tejet i rëndësishëm në këtë proces.

Burimi: ATSH