Thethi jo vetëm që mahnit me bukuritë e tij natyrore, por edhe ruan pasuri të rralla të trashëgimisë kulturore.

Ministri i Ekonomisë, Kulturës dhe Inovacionit, Blendi Gonxhja, publikoi në rrjetet sociale pamje mahnitëse të Luginës së Thethit, të mbuluar nga dëbora.

Në pamjet nga ajri bie në sy Kisha e Thethit në Fushë Theth, e ndërtuar në vitin 1892. Ajo është një nga ndërtimet e para monumentale të këtij vendbanimi. Kisha e Thethit ka shërbyer si qendër shpirtërore dhe kulturore, duke pritur në qelën e saj famullitarin At’ Shtjefën Gjeçovin. Pikërisht këtu, në vitin 1917, u hap shkolla e parë në Theth, me At’ Gjeçovin si mësuesin e parë.

Një tjetër atraksion turistik i Thethit është Kulla e Ngujimit, e ndërtuar në shekullin XIX, një tjetër monument kulture i rëndësishëm që na lidh me traditat dhe kodet e jetës së maleve.

Ndërsa Kulla e Lulash Keqit, dikur muzeu etnografik i Dukagjinit, ofron një pasqyrë të trashëgimisë së pasur të kësaj zone dhe është po ashtu monument kulture i kategorisë së parë.

“Me peizazhe që të lënë pa frymë, ajër të pastër dhe një ndjesi qetësie unike, Thethi është një thesar që meriton të vizitohet gjatë gjithë vitit”, shkroi ministri Gonxhja në rrjetet sociale.