Shqipëria dhe Spanja do të shtojnë bashkëpunimin në fushën e turizmit. Ministrja e Turizmit dhe Mjedisit Mirela Kumbaro pati një tryezë diskutimi me Ministrin spanjoll të Industrisë dhe Turizmit Jordi Hereu si edhe me Sekretaren e Shtetit për Turizmin, Rosario Sánchez Grau.

“Shqipëria e sheh Spanjën si një treg të rëndësishëm për turizmin në nivel vizitorësh, por edhe investimesh. Ne sot kemi marka hotelesh si “Melia”, kemi fluturime direkte nga disa destinacione të Spanjës dhe puna e përbashkët do të na ndihmojë që ta çojmë përpara këtë treg përmes dijeve, inovacionit, kreativitetit dhe edukimit në kapitale njerëzore”, u shpreh ministrja Kumbaro

Së shpejti, Ministria e Turizmit dhe Mjedisit e Shqipërisë dhe Ministria e Industrisë dhe Turizmit e Spanjës do të nënshkruajnë një Memorandum Bashkëpunimi për projekte të përbashkëta në inovacion, digjitalizim dhe përgatitje të burimeve njerëzore.

Viti 2024 u mbyll me gati 110 mijë vizitorë spanjollë ose 26% më shumë se vitit paraardhës.

Shqipëria përfaqësohet në Panairin “FITUR” i cili nis ditën e nesërme dhe konsiderohet i rëndësishëm për rritjen e tregjeve të Amerikës Latine. Për vitin që lamë pas patëm një rritje të ndjeshme nga disa prej këtyre vendeve me 17 mijë vizitorë nga Brazili (+26%), 5.8 mijë vizitorë nga Argjentina (+25%) apo 5 mijë vizitorë nga Meksika (+48%).

Burimi ATSH