Nga Dr. Marsela Musabelliu
Drejtore Ekzekutive e Institutit të Studimeve të Globalizimit (AIGS)

Viti i Ri Kinez përfaqëson frymën e rinovimit dhe shpresës, teksa familjet mblidhen për të festuar unitetin, mirëqenien dhe fillimin e një cikli të ri hënor. Është një kohë për nderimin e traditave, shprehjen e mirënjohjes dhe urimin e fatit të mbarë dhe lumturisë për vitin që vjen. Duke pritur mesnatën, familjet kineze i shoqëron Galasë së Festës së Pranverës që vjen si një spektakël vjetor, i prodhuar nga Grupi Mediatik i Kinës (China Media Group, CMG) i cili transmetohet çdo vit në prag të Vitit të Ri Kinez.

Foto nga CMG

Ky transmetim televiziv është një spektakël emocionesh, dhe na tregon se arti është firma ose nënshkrimi i vërtetë i një qytetërimi. Ngjyrat që shpalosen në harmoni, duke përzier traditën me modernitetin në mënyra që prekin jo vetëm anën pamore por edhe atë shpirtërore. Çdo performancë duket se tejkalon kohën, duke sjellë esencën e historisë së pasur të Kinës në të tashmen. Melodia kineze, e pakrahasueshme, si asgjë tjetër vjen duke zgjuar një ndjenjë të thellë lidhjeje me diçka më të madhe, të bën të shikosh thellë brenda vetes dhe të duket sikur fal atë drithërimën e brezave në tinguj. Vallëzimet janë një tjetër spektakël madhështor, çdo lëvizje një homazh për elegancën dhe hijeshinë e kulturës së lashtë kineze. Çdo hap, çdo gjest, është si një histori që tregohet pa fjalë, një poezi vizuale e trupit që flet direkt me mendjen. Dhe pastaj, digjitalizimi – mahnitës në arritjet e tij. Mënyra se si teknologjia shkrihet në performanca sjell magjinë e artit në jetë. Galaja është prova se, pavarësisht sa përparojmë, arti mbetet shpirti i qytetërimit, shprehja e përjetshme e asaj që është një popull. Si programi më i ndjekur televiziv i Kinës, Galaja është kthyer në një traditë që nga transmetimi i saj i parë më 1983. Tashmë me një histori 43 vjeçare, Galaja, edhe në fund janari të këtij viti 2025 vazhdon traditën me një spektakël mbresëlenës që tërheq shikueshmëri rekord.

Foto nga CMG

Jo thjesht një shfaqje….

Galaja e Festës së Pranverës ka shfaqur një përzierje spektakolare që përfshinin muzikë, komedi, artet tradicionale si opera dhe arte marciale, si dhe akte të jashtëzakonshme si magji dhe akrobaci. Ajo shpalos bukurinë e vendit dhe bashkim të 56 etnive kineze. Përdorimi i teknologjisë moderne sjell një përvojë të të paharrueshme për audiencën. Galaja e këtij viti është një ngjarje që shënon një tjetër hap në historinë mediatike kineze. Galaja, që fillon nga ora tetë pasdite, zgjat afro katër orë, dhe shoqëron të gjithë shikuesit në pragun e Vitit të Ri Kinez, duke tërhequr qindra miliona njerëz para ekraneve çdo vit, jo vetëm në Kinë por në mbarë botën.

Galaja e Festës së Pranverës shpalos për publikun një atmosferë shkëlqimi, krenarie kulturore dhe thellësi emocionale, duke mishëruar një shkrirje të pafundme të traditës dhe modernitetit. Kjo ngjarje pasqyron thelbin e historisë së gjatë e të pasur të Kinës, duke përqafuar gjithashtu dinamizmin e epokës moderne. Çdo element i Galasë, nga shfaqjet befasuese te kostumet e ndërlikuara dhe dizajni i përpunuar i skenës, është një dëshmi e përkushtimit, kreativitetit dhe saktësisë së atyre që janë përfshirë në krijimin e saj. Por ajo është edhe një festë e kulturës kineze në formën e saj më madhështore dhe nxjerr në pah kapacitetin e vendit për të përzier zakonet e lashta me artin inovativ. Koreografia mahnitëse, aftësia e interpretuesve për të integruar artin tradicional me efektet vizuale moderne krijojnë çaste magjepsëse që nuk janë vetëm shfaqje të aftësisë fizike, por janë të mbushura me rëndësi të thellë kulturore, duke u mbështetur në simbolikën e prosperitetit, unitetit dhe rinovimit që është thelbësore për festimet e Vitit të Ri Kinez.

Foto nga CMG

Vëmendja e kujdesshme ndaj detajeve, nga kostumet tek ndriçimi i skenës dhe efektet speciale, krijon një atmosferë që e transporton audiencën në një botë ku historia, mitologjia dhe e ardhmja ndërlidhen në një fraksion. Sekuenca e daulleve me intensitetin e saj ritmik dhe energjinë dhe përfshirja e fëmijëve në shfaqje të ndryshme, të veshur me kostume tradicionale, i shtojnë spektaklit një vello të pafajësisë dhe gëzimit dhe i kujtojnë audiencës vazhdimësinë midis brezave, pasi ata përcjellin traditat dhe vlerat që përcaktojnë kulturën kineze.

Duke nxjerrë shfaqje që janë të rrënjosura thellë në traditat kineze, por të paraqitura me dhunti moderne, Galaja në fakt bëhet një mjet për përforcimin e identitetit kombëtar. Ky shikim kolektiv nxit një ndjenjë të komunitetit, duke krijuar një lidhje emocionale midis shikuesve që të gjithë marrin pjesë në të njëjtën ngjarje kulturore.

Foto nga CMG

Mbulimi mediatik i Galasë së Festës së Pranverës

Gala e vitit të kaluar theu rekordet e shikueshmërisë, me 795 milionë shikues të angazhuar përmes platformave të mediave sociale dhe më shumë se 1.6 miliardë shikime totale duke kapur primatin “Guinness.” Kjo rritje që shënoi një shtesë prej 15.13% nga viti në vit, tregon se Galaja është gjithnjë e më e pëlqyer dhe gjithnjë më e lidhur me audiencën e re të Kinës dhe të mbarë botës. Me një përqindje marramendëse prej 75.61% të tregut të shikueshmërisë së televizionit live në Kinë, Galaja bëhet pa dyshim ngjarja më e rëndësishme për çdo festë të Vitit të Ri Kinez.

Media luan një rol parësor në rritjen e ndikimit të ngjarjeve si Galaja e Festës së Pranverës, duke e kthyer argëtimin e thjeshtë në mjet të fuqishëm për transmetimin kulturor, kohezionin social dhe krenarinë kombëtare. Shtrirja e mediave moderne, veçanërisht në epokën digjitale, ka zgjeruar dukshmërinë e ngjarjeve të tilla në mënyrë eksponenciale, duke i lejuar ato të shihen jo vetëm nga audienca vendase, por edhe nga shikuesit në mbarë botën. Ky ekspozim i shtuar shërben për të zmadhuar ndikimin e Festës, duke e shndërruar atë në një instrument kyç për diplomacinë kulturore dhe unitetin shoqëror.

Foto nga CMG

Galaja shtrihet përtej transmetimit të drejtpërdrejtë, duke përfshirë një gamë të gjerë si televizionin, transmetimin në internet dhe mediat sociale. Atmosfera e gjallë dhe e gëzueshme e shfaqjes ndihmon për të vendosur tonin për sezonin festiv, duke gjeneruar një ndjenjë emocioni dhe pritjeje që kontribuon në ngrohtësinë e festës. Pamjet vizuale, muzika dhe performancat përmbledhin frymën e Vitit të Ri Kinez, njëtrajtësohen me qytetarët duke i inkurajuar të reflektojnë mbi trashëgiminë dhe vlerat e tyre të përbashkëta.

Në një vend të madh dhe të larmishëm si Kina, me shumë rajone, grupe etnike dhe dialekte, Galaja e Festës së Pranverës shërben si një forcë bashkuese. Shfaqjet gjithmonë përfshijnë elementë nga rajone të ndryshme të vendit, duke festuar diversitetin e vendit duke theksuar njëkohësisht unitetin e tij. Roli i medias në transmetimin e këtyre elementëve të ndryshëm kulturorë ndihmon për të përforcuar idenë se pavarësisht dallimeve rajonale, të gjithë kinezët janë të lidhur nga trashëgimia e tyre e përbashkët dhe identiteti kombëtar kinez.

Shkalla e madhe e ngjarjes, me pamjet e saj mahnitëse, koreografia e përsosur dhe inovacionet teknologjike, shërben si një vitrinë e aftësive artistike dhe teknike të Kinës. Mbi të gjitha Galaja demonstron edhe një herë aftësinë e Kinës për të prodhuar një ngjarje të cilësisë së klasit botëror. Kjo njohje ndërkombëtare kontribuon në një ndjenjë krenarie në rritje midis popullit kinez, jo vetëm për trashëgiminë e tyre kulturore, por edhe për arritjet e vendit të tyre në skenën botërore.

Mbulimi mediatik i Galasë së Festës së Pranverës ka gjithashtu implikime sociale duke promovuar harmoninë, unitetin, familjen dhe rinovimin. Roli i saj në përhapjen e këtyre mesazheve ndihmon në promovimin e kohezionit social, pasi njerëzve u kujtohen vlerat që i lidhin ata së bashku si shoqëri. Roli i një ngjarjeje si Galaja e Festës së Pranverës është i shumëanshëm, duke rritur ndjesinë e atmosferës festive, duke nxitur unitetin shoqëror dhe duke promovuar krenarinë kombëtare.

Foto nga CMG

Së fundmi, Galaja e Festës së Pranverës është më shumë se thjesht një festë e Vitit të Ri Hënor; është një vitrinë e arritjeve kulturore të Kinës dhe qasjes së saj ndaj audiencës moderne. Nëpërmjet kësaj shfaqjeje madhështore Kina i prezanton botës krenarinë e një kombi të rrënjosur thellë në historinë e tij dhe nxjerr në pah një ndjenjë krenarie, jo vetëm në bukurinë e traditave të saj, por edhe në aftësinë e një kombi të madh i cili vit pas viti, shpalos risi duke ofruar një spektakël performancash që pasqyrojnë vlerat dhe tendencat në zhvillim të shoqërisë.

Galaja shërben si një kujtesë e rëndësisë së festimeve kulturore dhe dëshirës universale njerëzore për t’u bashkuar në momente gëzimi dhe reflektimi. Përmes Galasë së Festës së Pranverës, Kina shpalos jo vetëm thesaret e saj artistike dhe kulturore, por edhe ritualet e një feste mijëravjeçare që vlen në çdo aspekt të ndahet me botën.

Burimi CGTN