Kryeministri Edi Rama vlerësoi sot punën e Policisë së Shtetit, ndërsa theksoi se ka një hendek të madh mes perceptimit të publikut për rendin dhe sigurinë në Shqipëri dhe asaj që shfaqet në pasqyrat e deformuara për interesa politike, tregtare dhe mediatike.

Në Ministrinë e Brendshme u prezantua sot anketimi i financuar nga qeveria suedeze, për matjen e perceptimit qytetar mbi nivelin e sigurisë në vendin tonë dhe besimit tek Policia e Shtetit.

Kryeministri theksoi se ky anketim tërësisht i pavarur, kryhet për të gjashtën herë me iniciativën dhe nën mbikëqyrjen e qeverisë suedeze.

Ndiq "TiranaDiplomat.com" në Facebook

Rama citoi Aristotelin kur tha se “i vetmi shtet i qëndrueshëm është ai në të cilin të gjithë njerëzit janë të barabartë para ligjit”.

“Kurrë më shumë se sa sot Shqipëria nuk ka qenë e mobilizuar për ta arritur nivelin e barazisë para ligjit, çka nga njëra anë na është konfirmuar si fakt i pamohueshëm nga çelja e negociatave me Bashkimin Europian, që nuk janë as një dhuratë dhe as një vendimmarrje thjesht politike, por janë një konstatim i progresit të bërë në radhë të parë në aspektin e rritjes së nivelit të barazisë para ligjit”, shtoi Rama.

Nga ana tjetër, kryeministri theksoi se “kjo na vendos përditë përballë sfidës së rritjes së vazhdueshme të atij niveli barazie që rrit qëndrueshmërinë e lirive individuale, bashkëjetesës demokratike dhe sundimit të ligjit”.

Kryeministri theksoi se rezultatet e anketimit janë një tregues i qartë që ka një ecuri, ka një progres, por që ato shifra pasqyrojnë çfarë mblidhet nga publiku dhe jo ndonjë vullnet jashtë lirisë së plotë të publikut për t’u shprehur.

“Prandaj kanë edhe atë natyrshmëri dhe stabilitet të vazhdueshëm. Po të shikosh, dëgjosh e lexosh çfarë shfaqet, thuhet e shkruhet për Policinë e Shtetit për rendin e sigurinë në Shqipëri, ky është një vend për të ikur të gjithë me vrap, ku nuk ka rend, siguri”, shtoi Rama.

Burimi ATSH