Komisioni për Çështjet Europiane shqyrtoi sot projektpozicionin negociues për Grupimin e tretë të kapitujve: “Konkurrueshmeria dhe rritja gjithëpërfshirëse”, për negociatat për anëtarësimin në Bashkimin Evropian.

Për të prezantuar këtë projekt pozicion ishte e pranishme në komision, ministrja e Shtetit dhe Kryenegociatore, Majlinda Dhuka, e cila në fjalën e saj u shpreh se, “në këto ditë historike sot Shqipëria po hedh një hap të rëndësishëm në rrugën e saj evropiane”.

“Ne po diskutojmë me Kuvendin e Republikës së Shqipërisë mbi çeljen e negociatave për 8 fusha të reja të konkurrueshmërisë dhe rritjes gjithëpërfshirëse, pasi Bashkimi Evropian njohu progresin e Shqipërisë me reformat në këtë fushë, duke sinjalizuar se Shqipëria është e përgatitur për t’i çelur”, tha Dhuka.

Ndiq "TiranaDiplomat.com" në Facebook

Dhuka nënvizoi se, këto 5 muaj e fundit, Shqipëria ka bërë një progres të madh në rrugën e negociatave.

“Në 3 muajt e fundit të vitit 2024, Shqipëria çeli 10 kapituj dhe kritere. Këtë javë ne kemi diskutuar me ju 9 kapituj të tjerë të tregut të brendshëm dhe sot po diskutojmë me ju 8 kapituj të rrijtes gjithëpërfshirëse”, tha Dhuka.

Kjo do të thotë, shtoi Kryenegociatorja, “se në këto 6 muaj Shqipëria po progreson të çelë negociatat për 27 kapituj së bashku”.

“Ky është një proces unik, pakthyeshëm dhe i bazuar në merita dhe bazohet në rekomandimet pozitive të Komisionit Evropian dhe vlerësimin e vendeve anëtare”.

Duke iu përgjigjur kryetares së Komisionit Jorida tabaku, lidhur me zhvillimin e mbledhjes së komisionit me dyer të mbyllura, Duka theksoi se, “natyra konfidenciale e diskutimeve në këtë komision parashikohet nga ligji për rolin e Kuvendit në procesin e integrimit evropian dhe unë nuk mendoj se mund të komentojë më tej parashikimet e ligjit përveç se t’i respektoj plotësisht”.

Së dyti, ajo siguroi se, “procesi i përgatitjes së qëndrimit negociues është tërësisht i hapur. Ne kemi zhvilluar 32 tryeza diskutimi me grupet e interesit gjatë vitit 2024 dhe 2025 për të diskutuar çështje të ndryshme me interes në këto 8 fusha”.

Dhuka shtoi se, “Agjenda Evropiane e Reformave është e konsultuar, është e publikuar. Njëkohësisht edhe Plani Kombëtar i Integrimit Evropian që parashikon masat kryesore që trupëzohen edhe në qëndrimin negociues”.

“Qëndrimi negociues është vetëm një aspekt i procesit të negociatave që ligjvënësi e ka parashikuar të ruajë natyrën konfidenciale për arsye të karakterit të procesit të negociatave me BE-në. Por nga ana tjetër bashkëbisedimi me të gjitha grupet e interesit, përfshirja e të gjitha institucioneve dhe mjetet që ne përdorim si Plani Kombëtar i Integrimit Evropian janë tërësisht të hapura”.

Pas votimit nga anëtarët e Komisionit, seanca vijoi me dyer të mbyllura.