Kryekomisioneri Shtetëror i Zgjedhjeve Ilirjan Celibashi bëri sot një panoramë të procesit të përgatitjes për zgjedhjet e 11 majit, si për votuesit brenda vendit, por edhe për zgjedhësit nga jashtë Shqipërisë.

Celibashi tha gjatë bashkëbisedimit me gazetarët se për sa i takon votimit nga brenda vendit, tashmë ka nisur procesi i rekrutimit të operatorëve për pajisjen elektronike të identifikimit në qendrat e votimit.

“Ky proces ka filluar prej disa ditësh, ndërsa janë rreth 6500 aplikime deri tani për operatorë për 5200 qendra votimi. Numri përfundimtar i qendrave të votimit do të dalë pasi Drejtoria e Përgjithshme e Gjendjes Civile të përcjellë në KQZ ekstraktin e fundit të listës së votuesve brenda vendit”, informoi Celibashi.

“Kemi përgatitur së bashku me nënkomisioneren një program të dedikuar të trajnimit të operatorëve të pajisjes PER për votuesit, ndërkohë jemi në procesin e përgatitjes teknike të këtyre pajisjeve për të qenë gati për 11 maj. Kemi filluar procesin e përgatitjes së votimit elektronik për dy njësi, Njësinë Administrative Nr. 10 dhe bashkinë e Vorës dhe maksimumi brenda dy javëve do t’i instalojmë këto pajisje në dy qendra votimi që votuesit të familjarizohen me procesin”, tha Celibashi.

Kryekominsioneri shtoi se është duke u përfunduar edhe një spot dhe një tutorial për gjithë sa do të duhet të dijë dhe bëjë votuesi nga jashtë, në momentin kur do të marrë dokumentacionin zgjedhor dhe brenda 2-3 ditëve spoti do të bëhet publik në media dhe rrjetet sociale.

“Po ndërtojmë një sistem të ndihmës dhe këshillës për votuesit nga jashtë, për rastin kur ata do të kenë nevojë për sqarime për procedurat e votimit, por në setin e dokumentacionit që ne do t’u dërgojmë do të jetë edhe një udhëzues që i sqaron në mënyrë të plotë dhe të qartë”, shtoi ai.

“Kemi përcaktuar dhe vendin e numërimit dhe përgatitjes së dokumentacionit për votimit nga jashtë dhe ai do të jetë pallati i sportit “Feti Borova”, te Parku Olimpik i Tiranës. Pamjet e këtij procesi do të jenë drejtpërdrejtë 24/7, që nga momenti i parë i nisjes së procesit, deri ditën e përfundimit. Në këtë ambient do të pritet edhe dokumentacioni zgjedhor, do të bëhet edhe numërimi dhe vlerësimi i fletëve të votimit, në prani të medias, vëzhguesve të ndryshëm të partive politike dhe i monitoruar me kamera 24/7”, pohoi Celibashi.

Kryetari i KQZ-së nënvizoi se numri përfundimtar i votuesve nga jashtë është 245 935 zgjedhës, në listën e votuesve nga jashtë.

I pyetur nga gazetarët në lidhje me ndryshime të mundshme apo heqjen e emrave të kandidatëve që janë tërhequr tashmë nga gara për zgjedhjet e 11 majit, Celibashi tha se nuk ka asnjë kompetencë ligjore për ndryshime të emrave të kandidatëve në listat respektive apo ato shumemërorë të partive.

Celibashi shpjegoi sërish procesin e dorëzimit të zarfit me fletën e votimit për votuesit nga jashtë, duke theksuar se operatori i shërbimit postar do të bëjë deri në tri tentativa për t’ia dorëzuar zgjedhësit në dorë zarfin me dokumentacionin përkatës.

“Do të duhet që operatori i shërbimit postar, t’ia dorëzojë individit në dorë fletën e votimit dhe asnjërit prej familjarëve apo bashkëjetueseve të tjerë. Janë tri tentativa që do të bëhen në orë të ndryshme, mund t’i lërë një njoftim zgjedhësit që nuk e gjen në banesë për t’u paraqitur zgjedhësi te një pikë për ta tërhequr, kundrejt paraqitjes së një dokumenti identifikimi. Në çdo lloj rrethane operatori postar duhet t’ia dorëzojë individit në dorë zarfin me fletën dhe dokumentacionin përkatës”, pohoi Celibashi.

Kryekomisioneri nënvizoi faktin se postieri do të paraqitet tek adresa që zgjedhësi ka dhënë dhe të dhënat do të merren nga KQZ. “Nëse zgjedhësi ka deklaruar në PER adresën ku ka vendqëndrimin, e sigurt që fleta do t’i mbërrijë. Nëse ka pasur gabime, kjo nuk është përgjegjësi as e KQZ-së, as e postës”, tha Celibashi, ndërsa shtoi se refuzimi për 48 mijë zgjedhës në platformën PER ka ndodhur për shkak të mospërputhjes së të dhënave që janë deklaruar në PER me ato në dokumentacionet përkatëse.