Kryepeshkopi i Tiranës, Durrësit dhe gjithë Shqipërisë, Fortlumturia e Tij, Imzot Joani ishte i ftuari i radhës i kryeministrit Edi Rama në podkastin “Flasim”.
Ndërsa tregoi fillesat e rrugëtimit të tij si prift, Kryepeshkopi Joan tregoi se në vitin 1992 kontaktoi me Kryepeshkopin Anastas dhe u kthye në Shqipëri, pas qëndrimit të tij në SHBA.
Ai e vlerësoi Kryepeshkopin Anastas si një tjetër figurë të ndritur në historinë e kishës.
“Bëri të mundur rindërtimin nga gërmadhat me durim të madh dhe dashuri për Kishën e njerëzit. Nuk mund të qëndrosh tre dekada edhe më shumë, shpeshherë me kundërshtime po nuk pate një dashuri të madhe për kishën dhe njerëzit. Përvoja që kam duke qenë me të për 32 vite e kam parë se e donte vendin dhe njerëzit. Shpeshherë në Greqi ka pasur ankesa se ishte më tepër shqiptar se sa duhet”, tregoi Imzot Joani.
Kryeministri Rama kujtoi bisedën me kryepeshkop Joanin vite më parë në Korçë kur e pyeti për Kryepeshkopin Anastas, në një kohë kur në vend kishte rezerva të përgjithshme për të jashtë mureve të kishës.
“Dhe te unë kishte një lloj ideje se ai është grek, na sjell grekët. Madje ndaj tij janë bërë sulme të paimagjinueshme politike deri te Kushtetuta e re që ishte tentativë për ta nxjerrë jashtë. Ju më thatë një fjali që mua më mbeti shumë fort në mendje duke ju njohur dhe duke ditur atdhetarinë që ju keni. Më thatë: Ai është një shqiptar si gjithë shqiptarët e tjerë që kemi ne në Kishën Ortodokse dhe sikur të ishin të gjithë aq shqiptar sa ai do ishte shumë më mirë”, tregoi Rama.
Kryeministri kujtoi po ashtu intervistën e fundit të Kryepeshkopit Anastas për mediet greke, të cilën e cilësoi kapakun e floririt mbi të gjithë çfarë u dyshua e u tha për të.
“Të bëhej një deklaratë e tillë në Romë nuk do të bënte lajm, por në Greqi, në atë lloj mjedisi të ngarkuar në mënyrë të posaçme me gjëra të caktuara mënyra se si e tha që pasardhësi im nuk mund të jetë veçse shqiptar dhe ne kemi shkuar atje për të rindërtuar Kishën Autoqefale të Shqipërisë nuk kemi vajtur atje të bëjmë koloni, ajo intervistë ishte e jashtëzakonshme. Gati nuk më besohej dhe nuk ishte e lehtë të besohej se nga ajo intervistë dhe kjo vendosmëri për të caktuar pasardhësin shqiptar e mbrojti autoriteti i tij i jashtëzakonshëm moral që kishte se kundërshti ka pasur, nuk kanë dalë në pah shumë, por ka pasur”, tha Rama.
Kryeministri kujtoi edhe bisedën pas funeralit të Kryepeshkopit Anastas me kryeministrin e Greqisë, Kyriakos Mitsotakis.
“I thashë se fjalimi im ishte një lloj borxhi se ky njeri ka marrë shumë baltë në këtë vend dhe me atë që bëri në fund, edhe mua vetë që kam pasur marrëdhënie shumë të mirë me të për hir të së vërtetës por kam pasur diku në mendje atë dilemën ky njeriu është shërbëtor i kishës shqiptare apo gjithsesi mbetet njeriu i huaj që ka me vete edhe ato retë që kanë më vete të huajt? Dhe na bëri të ndihemi të vegjël. Kryeministri grek më tha se më kanë ardhur edhe mua zëra që çfarë bëhet kështu, dhe e kam pasur shumë të thjesht: Ai e di më mirë se të gjithë ne dhe shtoji se autoritetin e kishte absolut”, tregoi Rama bisedën me homologun grek.
Kryepeshkop Joani theksoi se atdhetar është ai njeri që lulëzon vendin e tij në detyrën që ka dhe Kryepeshkopi Anastas u përpoq të ndërtonte një kishë solide lokale.
“Jo vetëm me fjalë por me vepra. Autoqefalia është pavarësia financiare dhe bëri çmos që në kohën kur të mos ishte, Kisha të mos falimentonte, të ishte në gjendje të mbahej vetë. Ndërtimi i dy HEC-eve i dha frymëmarrje Kishës, nëse do ishim varur financiarisht nuk mund të jesh krejtësisht i lirë. Kjo përpjekje për ta bërë kishën e pavarur edhe kur të mos ishte tregon dëshirën e tij për të ndërtuar një kishe solide lokale dhe jo vetëm ta ringrinte por edhe kisha të vazhdonte”, tha ai.
Burimi ATSH
