Kryeministri Edi Rama dhe ministri i Mbrojtjes Pirro Vengu ishin sot në Zall Herr për prezantimin e arritjeve dhe sfidat e të ardhmes në fushën e mbrojtjes.

Gjatë fjalës së tij kreu i qeverisë theksoi se do të jetë në fokus qëllimi i të qenurit një vend eksportues i prodhimeve ushtarake.

Më tej, Rama shtoi se me rëndësi është edhe shfrytëzimi i industrisë mbrojtëse për krijimin e një baze për të rinjtë, duke iu plotësuar kërkesat e tyre.

“E dimë shumë mirë historinë se si u shkatërrua totalisht baza industriale e FA, e dimë shumë mirë se sa e vështirë ka qenë për të dalë nga humnera ku ranë Forcat e Armatosura, nuk ka nevojë të bëjmë shumë histori, por dimë shumë mirë dhe diçka tjetër, që sot i kemi kushtet dhe i kemi mundësitë që të ndërtojmë një industri, e cila brenda kësaj dekade të na jape, jo vetëm mbrapsht një aset të munguar të Republikës së Shqipërisë, pikërisht asetin e kësaj industrie, por brenda kësaj dekade të na japë edhe një kapacitet të ri të fitimit në aspketin financiar për të riinvestuar në FA dhe për të riinvestuar në jetën e vendit”, theksoi Rama.

“Më vjen shumë mire, që sot kemi dhe një ekip që është ndërtuar pikërisht për këtë, jo vetëm ministri, por zëvendësminstrja Blerina, e cila ka lënë një pozicion pune shumë më të respektuar në nivelet më të larta të qeverisjes së industrisë ushtarake në Lindjen e Mesme pas një eksperience shumë të respektuar në një ndër kompanitë më të mëdha globale të ekselencës ushtarake ‘’Leonardo’’ në Itali; kemi Dorianin që e kemi një aset të rëndësishëm, por që tanimë ia kemi vënë në dispozicion pikërisht Agjencisë së re të Industrisë së Mbrojtjes; kemi Ardin që i kemi besuar drejtimin e KAYO-s që është ndërmarrja jonë e re kombëtare e prodhimit dhe patjetër edhe Enkelejdin, i cili ishte i pari që hyri në këtë grup të drejtimit të Ministrisë së Mbrojtjes si menaxher edhe as si dikush që ishte për t’u akomoduar diku dhe hajt se po e çojmë zëvendësministër tek Mbrojtja se kështu ndodhte në të kaluarën “Ku ta çojmë? Çojeni të mbrojtja, të marrë një makinë e të marrë celular e të vijë vërdallë”, tha Rama.

“Kemi, mbi të gjitha, një filozofi të re në këtë drejtim për të investuar të gjitha këto kapacitete të reja financiare në dispozicion të mbrojtjes për të marrë mbrapsht atë që investojmë, jo thjesht dil e blej e pastaj mbaje atje se “jo nuk ka mirëmbajtje, jo po nuk punon kjo, jo po nuk ka pjesë këmbimi për këtë”, por prodhim, prodhim, prodhim e jo bëj kontrata, përveçse për gjëra ekskluzive të cilat nuk bën as sens të mendosh të krijosh bazë prodhuese për zhvillimin në Shqipëri me kompani të huaja, por fto kompanitë e huaja që duan të bëjnë biznes duke shitur për Forcat tona të Armatosura që të bashkohen si partnerë me KAYO dhe të prodhojnë së bashku, edhe për nevojat tona të brendshme edhe për eksport”, tha Rama.

“Ne do të jemi një vend eksportues i prodhimeve ushtarake brenda kësaj dekade, ky është qëllimi, dhe jemi në rrugën e realizimit, duke parë se si po ecin edhe diskutimet me kompani të mëdha të ekselencës botërore që kanë shprehur gatishmërinë të na bashkohen në këtë aventurë të re”, u shpreh Rama.

“Ndërkohë që, pa diskutim qëllimi ynë është që të shfrytëzojmë industrinë e mbrojtjes edhe për të krijuar një bazë tërheqëse për vajza dhe djem të talentuar, të specializuar, profesionistë që jo vetëm të mos largohen nga vendi, por edhe të kthehen nga jashtë duke kontribuuar në këtë industri sepse do të kenë paga që do të jenë absolutisht dinjitoze dhe do të jenë absolutisht të arsyeshme për kërkesat e tyre”, tha ai.

Burimi ATSH