Kryeministri Edi Rama ka folur për hakërimin e të dhënave të qytetarëve shqiptarë dhe publikimin e tyre online në Forumin Ekonomik Botëror të Davosit 2023.

Rama theksoi se pas këtij sulmi qëndron Irani dhe këtë e kanë të faktuar. Ai u shpreh se ana e frikshme e pranisë së krimit kibernetik është se “kiberkriminelët mund të jenë në shtëpinë tënde dhe ti nuk e di që i ke aty”.

Ai shtoi “janë depërtime dhe është njësoj si të marrësh e të vendosësh mina me sahat dhe të përcaktosh ditën, kohën kur të shpërthesh minën dhe deri atëherë, ti nuk e di që je duke fjetur mbi një minë.”

“Përmes një analize shumë tërësore që ne e bëmë përmes ekipit kundër kërcënimeve të Microsoft dhe ekipit të FBI arritën në përfundimin se ishte absolutisht e qartë se pas këtij sulmi ishte një shtet dhe konkretisht Irani. Ky është një sulm që i atribuuam Iranit bazuar në fakte.

Ana tjetër e pranisë të frikshme të krimit kibernetik në jetët tona është se nuk është njësoj si dikush që të hyn në shtëpi, të shpërthen derën apo të thyen dritaren dhe hyn. Kiberkriminelët mund të jenë në shtëpinë tënde dhe ti nuk e di që i ke aty.

Pra, janë depërtime dhe është njësoj si të marrësh e të vendosësh mina me sahat dhe të përcaktosh ditën, kohën kur të shpërthesh minën dhe deri atëherë, ti nuk e di që je duke fjetur mbi një minë”, tha Rama.