Kryeministri Edi Rama ka nisur vizitën zyrtare në Tokio të Japonisë.

Rama ka publikuar në rrjetet sociale foto nga takimi me drejtues të Agjencisë Japoneze të Bashkëpunimit Ndërkombëtar.

Kreu i Ekzekutivit shprehet se gjatë këtij takimi u diskutua për një sërë projektesh me rëndësi.

Ndiq "TiranaDiplomat.com" në Facebook

Kryeministri shoqërohet në këtë vizitë zyrtare nga ministrja e Ekonomisë, Delina Ibrahimaj, ministrja e Bujqësisë dhe Zhvillimit Rural, Frida Krifca dhe ministrja e Turizmit, Mirela Kumbaro.

Rama po zhvillon vizitë zyrtare në Tokyo, Japoni deri në 25 Shkurt në kuadër të 42-vjetorit të vendosjes zyrtare të Marrëdhënieve Diplomatike Shqipëri-Japoni.

Më herët zyra për shtyp e kryeministrit njoftoi se ai “do të zhvillojë një sërë takimesh, në kuadër të forcimit dhe thellimit të bashkëpunimeve mes dy shteteve, duke rikonfirmuar miqësinë mes dy vendeve, si edhe angazhimin e ndërsjellë për zhvillimin e mëtejshëm të bashkëpunimit në sferën dypalëshe dhe shumëpalëshe, në përballimin e sfidave së bashku si miq dhe aleatë që ndajnë të njëjtat vlera”.

Kryeministri Edi Rama do të zhvillojë një takim bilateral me Kryeministrin i Japonisë, Fumio Kishida, si dhe do të marrë pjesë së bashku me delegacionin që e shoqëron, në darkën e shtruar prej tij.