Kryeministri Edi Rama ishte pasditen e së shtunës në Këlcyrë, ku gjatë një takimi elektoral, për zgjedhjet vendore të 14 majit, tha se, “në Këlcyrë e Përmet ecet shumë sigurtë përpara me kryetarët Klement Ndoni dhe Alma Hoxha”.

“Shqipërisë vijon t’i bjerë në qafë akoma një individ ‘non-grata’, se mirë që ia falën atë që gjysmën e jetës e kaloi me partinë që vrau e preu, por tani prapë. Unë mendoj se është e tepërt ta diskutojmë përsëri këtë gjë. Nëse në këto vitet e fundit kemi parë shumë gjëra të mira që të ndodhin për Këlcyrën, Përmetin dhe gjithë qarkun Gjirokastër, në vitet që vijnë do të shohim edhe më shumë, se i kemi hedhur themelet e sigurta”, u shpreh Rama.

Kryeministri theksoi se, “jemi në një kthesë historike për ekonominë shqiptare, megjithëse kemi pasur një vargmal me probleme si, tërmeti, pandemia, lufta, inflacioni. Juve sot çmimi i energjisë ju vjen po njësoj dhe kjo sepse qeveria paguan që familjeve të mos u rëndohet fatura. Ne e kemi bërë zero taksën për biznesin e vogël, që të ketë më shumë forcë dhe mijëra biznese të reja të vogla janë hapur. Ndërkohë që rrogat kanë hyrë në një proces rritje”.

“Ne kemi nisur procesin e rritjes së pagave për të kaluar deri në prillin e ardhshëm pagën mesatare në Shqipëri nga 530 në 900 euro, ky është një fakt për të kuptuar që jemi në rrugën e duhur dhe e ardhmja do të jetë shumë e mirë”, informoi Rama.

Rama tha se, me PS është e ardhmja. “Si mundet midis nesh të ardhmes të rivendosen ata që kanë mbetur me të shkuarën? Për çfarë? Për të na kthyer mbarapa? E kanë interpretuar shqetesimin tim si kërcënim, por ai është fakt, nese Këlcyra kthehet mbrapa do të jetë e pamundur për t’u mbështetur nga ne. Jo sepse ne nuk duam, por sepse këta kandidatë që janë shpërnadrë nëpër Shqipëri për të sjellë këtu renë që është mbi kokën e ‘non-gratës’, nuk kanë ardhur për të vazhdur punët e mira. Kandidatë që premtojnë ujë falas nëpër çezma, duhen hedhur në lumë e duhen larë me ujë të ftoftë, sepse këta sjellin atë që sjellin gjithmonë, frymën e Sudes dhe Rapushit dhe nuk kanë respekt për njerëzit. Këta i shikojnë bashkitë si këshjella për t’i marrë peng, si mundësi për t’i dhënë punë çdo personi, kurse ne i gjejmë njeriun punës”, deklaroi Rama.