Jack Ma, një ndër biznesmenët më të mëdhenj të botës, themeluesi i grupit “Alibaba”, tregut të tretë më të madh botëror online dhe të parit në Azi në infrastrukturën e shërbimeve, ka vizituar këtë javë Shqipërinë.

Ai është parë të darkojë në një ndër restorantet më të njohura të Tiranës, në “Padam”, i shoqëruar me stafin e tij më të ngushtë.

Arsyeja e vizites nuk është ende e qartë, por Jack Ma duket se po sheh ta zgjerojë aktivitetin e biznesit të tij edhe në rajonin e Ballkanit.

Ndiq "TiranaDiplomat.com" në Facebook

Këtë javë, ai vizitoi edhe Beogradin, ku u filmua po ashtu duke festuar në një lokal të kryeqytetit serb.

Mediat serbe shkruajnë se vizita e tij është në interes të biznesit vendas, pasi gjithnjë e më shumë kompani private serbe, si dhe institucione shtetërore, kanë kontakte biznesi me grupin “Alibaba” dhe ky numër është në rritje të vazhdueshme.

Hapja e filialeve të dyqanit online “Alibaba”, me faqen “AliExpress”, në rajonin e Ballkanit flitet prej vitesh, ku në fokus është ngritja e një qendre shpërndarjeje logjisitike, e cila do të shkurtonte ndjeshëm periudhën e dorëzimit të blerjeve.

Në Serbi, sekretarja Shtetërore e Ministrisë së Tregtisë, Turizmit dhe Telekomunikacionit, Tatjana Matiq, e konsideroi një çështje madhore ardhjen e grupit “Alibaba”, i cili biznesin e tij po shtrin me shpejtësi edhe në fushën e Teknologjisë së Informacionit.

Edhe vizita e themeluesit Jack Ma në Tiranë duket se është në linje me planet e grupit “Alibaba” për të investuar në Ballkan.

Me 27.4 miliardë Dollarë pasuri, Jack Ma reditet nga revista Forbes në vendin e 63 në listën e miliarderëve të botës dhe në të tretin në Kinë.

Ai ishte mësues anglishtje kur e themeloi faqen e internetit “Alibaba.com” në vitin 1999 së bashku me 17 studentë të tjerë për ta bërë një prej kompanive kryesore të logjistikës në botë. U largua nga posti i drejtorit ekzekutiv në vitin 2019 për t’u kthyer në vitin 2023 kur “Alibaba” zbuloi një plan për t’u ndarë në gjashtë biznese.

Tv Klan