PBB-ja e Kinës u rrit 5.2 për qind në tre tremujorët e parë të këtij viti krahasuar me të njëjtën periudhë të vitit të kaluar, treguan të dhënat zyrtare të mërkurën.

Rritja në nëntë muajt e parë të vitit ka vënë një themel të fortë për arritjen e objektivit vjetor të rritjes së Kinës prej 5 për qind, tha Sheng Laiyun, zëvendësdrejtori i Zyrës Kombëtare të Statistikave.

PBB-ja e Kinës në tremujorin e tretë u shtua 4.9 për qind, duke i tejkaluar parashikimet e analistëve për një rritje prej 4.4 për qind sipas një sondazhi nga “Reuters”.

“Përtëritja e Kinës po rifiton ritmin në një mënyrë më të qëndrueshme, kryesisht falë konsumit të madh gjatë verës dhe prodhimit industrial më të fortë sesa pritej,” tha për CGTN-in Bruce Pang, kryeekonomisti dhe kreu i kërkimeve në degën e JLL për Kinën.

Foto nga VCG

Nga janari deri në shtator, investimet në pasuritë fikse u rritën me 3.1 për qind në krahasim me të njëjtën periudhë të vitit 2022. Gjatë së njëjtës periudhë, prodhimi industrial me vlerë të shtuar u rrit me 4.0 për qind dhe shitjet me pakicë të mallrave të konsumit u shtuan me 6.8 për qind. Të dy shifrat i kaluan parashikimet e analistëve.

Sheng vuri në dukje se norma e papunësisë urbane ra me 0.2 pikë përqindjeje, duke arritur në 5.0 për qind në shtator dhe duke rënë për dy muaj me radhë.

Përmirësimi i gjendjes së punësimit është një tregues shumë i rëndësishëm i rimëkëmbjes ekonomike dhe tregon një ndryshim pozitiv, shtoi Sheng.

Kina ka marrë një sërë masash me objektiv të saktë për zgjerimin e kërkesës dhe rritjen e besimit të tregut në tremujorin e tretë, duke përfshirë uljen e normës së rezervës së kërkuar e lehtësimin e kufizimeve në tregun e pronave.

Foto nga VCG

Politikat fiskale e industriale në vend të stimulimit monetar do të jenë të nevojshme për të vijuar rimëkëmbjen, theksoi Pang, duke shtuar që mbështetja me politika duhet bërë në “një mënyrë graduale dhe të qëndrueshme.”

Fondi Monetar Ndërkombëtar parashikoi të mërkurën që ekonomia kineze do të rritet me 5 për qind në vitin 2023, në përputhje me parashikimet e qeverisë.

Burimi: CRI.CN