Ministri i Brendshëm, Taulant Balla mori pjesë në Bruksel për konferencën ndërkombëtare kundër trafikimit të emigrantëve

Balla deklaroi në konferencën ndërkombëtare, mbajtur në Bruksel, se vendet duhet të shtrëngojnë duart në një përpjekje të përbashkët për të kundërshtuar valën në rritje të kontrabandës së emigrantëve. Duke mbajtur fjalën në këtë event me rëndësi për vetë BE-në, Balla vuri theksin tek pesha e aleancës mes kombeve, që dëshmon angazhimin për zgjidhje bashkëpunuese.

Duke raportuar mbi masat e marra nga Shqipëria në përballjen me migracionin e paligjshëm, ai tha se Policia e Shtetit ka identifikuar 177 raste të kontrabandimit të emigrantëve, 9 raste të trafikimit të të miturve dhe 11 raste të trafikimit të personave, duke çuar në identifikimin e 330 autorëve të përfshirë, 147 prej tyre të arrestuar.

“Vetë natyra e kontrabandës së emigrantëve i kapërcen kufijtë dhe është shumë e qartë se një qasje e njëanshme është e pamjaftueshme.

Një aleancë globale shërben si një mekanizëm i fuqishëm për shkëmbimin e inteligjencës kritike, burimeve dhe praktikave më të mira. Shqipëria parashikon një aleancë globale të ndërtuar mbi parimet e unitetit, përgjegjësisë së përbashkët dhe veprimit kolektiv”, ishte propozimi i ministrit Balla në Konferencë.

Komisionerja Johansson ndërhyri duke i dhënë fjalën Ballës, duke u shprehur se sot është Dita e Pavarësisë e Shqipërisë dhe ai po e feston së bashku në këtë Konferencë Ndërkombëtare.

“Gjithashtu jam shumë e kënaqur, sepse u informova për operacionin e përbashkët me vendet anëtare të BE-së, Italinë dhe Greqinë, me EUROJUST dhe EUROPOL, çmontuat një organizatë të madhe të krimit të organizuar të përfshirë në kontrabandimin e migrantëve. Një rrjet kriminal me 18 anëtarë të dyshuar, që kanë ndërmarrë të paktën 30 operacione në det të kontrabandimit”, tha ajo.

Balla nga ana e tij u shpreh se lufta kundër kontrabandës së emigrantëve përbën një sfidë për shumë vende.

“Ne, qeveria e Shqipërisë, jemi fuqishëm të përkushtuar për të luftuar plagën e kontrabandës së emigrantëve. Angazhimi ynë reflektohet në politikat dhe strategjitë e prekshme kombëtare që nënvizojnë rëndësinë e kësaj çështjeje dhe ne kemi treguar vazhdimisht përkushtimin tonë për t’u përballur me sfidat e paraqitura nga kontrabanda e emigrantëve. Duke bërë të gjitha përpjekjet tona për të trajtuar sfidat e këtij fenomeni, ne kemi përafruar legjislacionin tonë në përputhje të plotë me Konventën e Kombeve të Bashkuara kundër Krimit të Organizuar Transnacional dhe dispozitat e Direktivës së Këshillit 2002/90”, tha ai.

“Strategjia e Shqipërisë kundër Krimit të Organizuar dhe Krimeve të Rënda 2021-2025 trajton betejën kundër kontrabandës si një komponent i luftës më të gjerë kundër krimit të organizuar. Ai vë theksin në zvogëlimin e kërcënimit që vjen nga aktivitetet e paligjshme që lidhen me trafikimin, duke përfshirë dhënien e ndihmës për kalimet e paligjshme të kufirit”, vijoi Balla.

“Gjatë këtij viti, strukturat e Policisë së Shtetit Shqiptar kanë raportuar 177 raste të kontrabandës së emigrantëve, 9 raste të trafikimit të të miturve dhe 11 raste të trafikimit të personave. Operacionet policore lidhur me këto raste çuan në identifikimin e 330 autorëve të përfshirë dhe 147 prej tyre u arrestuan. Emigrantët e parregullt të kombësive të ndryshme përdorin si rrugë tranziti territorin e Republikës së Shqipërisë, duke synuar të kalojnë nëpër rrugët e Ballkanit Perëndimor drejt vendeve të Bashkimit Europian.”, tha Balla.

“Ne qëndrojmë të përkushtuar të respektojmë angazhimet dhe përgjegjësitë tona në bashkëpunimin tonë me Agjencinë Europiane të Kufirit dhe Rojës Bregdetare. Prej disa vitesh oficerët e FRONTEX po kryejnë patrullime të përbashkëta me Policinë Kufitare Shqiptare në të gjitha pikat e kalimit kufitar. Ne i nxisim vendet e Ballkanit Perëndimor që të bashkëpunojnë brenda një kuadri të tillë, si dhe përmes EUROPOL-it”, tha Balla.

Ne promovojme rritjen e bashkëpunimit nëpërmjet krijimit të ekipeve të përbashkëta hetimore, të cilat janë dëshmuar të jenë ndër përvojat më efektive dhe transformuese në bashkëpunimin policor.

“Ne vlerësojmë programin e ardhshëm që Komisioni do të miratojë në Ballkanin Perëndimor për të trajtuar kontrabandën dhe për të përmirësuar kontrollet tona kufitare duke investuar në më shumë teknologji dhe menaxhim të avancuar të kufijve.

Si përfundim, është e një rëndësie të menjëhershme krijimi i një kuadri të përbashkët për shkëmbimin në kohë reale të të dhënave dhe analizave mbi flukset migratore përgjatë rrugës së Ballkanit Perëndimor, si dhe midis shteteve anëtare të BE-së”, tha Balla.