Nga Dr. Marsela Musabelliu

Një udhëheqje efektive që ka prioritet përgjegjshmërinë dhe komunikimin e qartë është thelbësore për ndërtimin e një kulture pozitive dhe për forcimin e besimit në radhët e qytetarëve. Liderët që shprehin vizionin dhe qëllimet e tyre në një mënyrë të qartë, transparente, dhe duke bërë përditësime të rregullta mbi progresin e vendit, fitojnë gjithmonë mbështetje dhe besim.

Në fund të çdo viti, lidershipi i Kinës mblidhet në një sërë konferencash dhe takimesh për të pasqyruar punën, arritjet, sfidat dhe për të projektuar detyrat dhe direktivat për vitin që vjen. Çfarë u pa në dhjetor të vitit të kaluar, në këto konferenca është gatishmëria e Kinës për të punuar kolektivisht me vende të tjera për të adresuar sfidat e përbashkëta. Lidershipi i Kinës kontribuon në bashkëpunim ndërkombëtar dhe prosperitet ekonomik, por gjithashtu përmirëson pozitën e vendit si një pjesëmarrës i përgjegjshëm dhe proaktiv në bashkësinë ndërkombëtare.

Xinhua

Pjesëmarrja e Presidentit Xi në këto evente tregon rëndësinë e planifikimit strategjik dhe qeverisjes proaktive që është e kujdesshme ndaj nevojave dhe mundësive, në nivel kombëtar dhe global. Këto konferenca të Kinës shihen si një demonstrim i transparencës, hapjes dhe një përkushtimi për mbrojtjen e interesave të vendit në skenën botërore dhe çështjet globale.

Përkushtim për prosperitet

Peizazhi ekonomik i Kinës në vitin 2023 dhe projeksionet për vitin 2024 u prezantuan në Konferencën Qendrore Vjetore të Punës Ekonomike, e cila përfshiu një fjalim të rëndësishëm nga Presidenti i Kinës, Xi Jinping. Duke dalë me një raport pozitiv, kjo konferencë paraqiti një këndvështrim të nuancuar të arritjeve, sfidave dhe nismave strategjike, duke analizuar aspektet e shumta të rrjedhës ekonomike të vendit, dhe duke theksuar qëndrueshmërinë, fuqinë inovative dhe vetëbesimin. Konferenca identifikoi nëntë fusha të rëndësishme prioritare për agjendën ekonomike të Kinës në 2024. Këto përfshijnë zhvillimin teknologjik, prodhimin me cilësi të lartë, konsumin e brendshëm, teknologjinë gjelbër, hapjen e mëtejshme përmes kanaleve të reja, modernizimin dhe rinovimin e infrastrukturës ekzistuese, adresimin e kapacitetit të tepërt, stabilizimin e sektorit të pronave, dhe menaxhimin e sfidave gjeopolitike.

CFP

Rimëkëmbja ekonomike në vitin 2023 është një dëshmi se, pavarësisht sfidave, vendi ka bërë progres substancial në zhvillimin cilësor. Shpenzimet e konsumatorëve kanë dalë në pah si një nga forcat kryesore, duke kontribuar në mënyrë të konsiderueshme në rritjen ekonomike. Në veçanti, vlen të theksohet ngritja e sektorëve të teknologjisë, investimeve në bateritë diellore, makinat elektrike, etj, janë bërë pjesë e rëndësishme e tregtisë së huaj të Kinës. Të dhënat nga Zyra Kombëtare e Statistikave tregojnë një trend inkurajues, me shpenzimet e konsumatorëve duke kontribuar 83.2 për qind në rritjen ekonomike në tre muajt e parë të vitit.

CFP

Duke parë në vitin 2024, theksi në nismat politike shfaq një qasje proaktive për të siguruar stabilitetin, nxitur rritjen dhe mbajtur punësimin. Përkushtimi për rregullime në politikat makro, së bashku me një politikë fleksibël fiskale dhe një politikë monetare e kujdesshme, nxit më tej vetëbesimin e tregut. Përkushtimi i Bankës Popullore të Kinës për të mbajtur normat e interesit në një nivel të përshtatshëm dhe mbështetjen e strategjive kombëtare kyçe tregon një kuptim të qartë të natyrës së shumëfishtë të sfidave ekonomike. Fokusi në përmirësimin e efikasitetit dhe zbatimin e politikave strukturore të zvogëlimit të taksave dhe tarifave tregon një përkushtim për të nxitur një mjedis ekonomik të qëndrueshëm dhe dinamik.

Në fakt, kryefjalë e së ardhmes është dedikimi i Kinës për inovacionin teknologjik, i cili shfaqet në theksin e konferencës mbi ndërtimin e një sistemi industrial modern. Ndërsa qëllimi i stimulimit të kërkesës së brendshme mbetet, ka një lëvizje të dukshme drejt shfrytëzimit të teknologjisë, si përcaktues kryesor të zhvillimit ekonomik. Nxitja e një industrializimi të ri, zhvillimi i ekonomisë dixhitale dhe përshpejtimi i inteligjencës artificiale tregojnë një vizion që shikon përpara. Përpjekjet e përbashkëta për zgjerimin e kërkesës së brendshme, sidomos në fushat e konsumit digjital, të gjelbër dhe të shëndetshëm, tregojnë një përkushtim për jo vetëm të rimëkëmbjes nga pandemia, por gjithashtu rritjen e qëndrueshme.

CFP

Më tej, përkushtimi për hapjen në nivel të lartë, të tregtisë së huaj, stabilizimit të sektorit të pronave të patundshme. tregon vendosmërinë e Kinës për të mbetur një lojtar kyç në pejzazhin ekonomik global.

Trajektorja pozitive e përcaktuar në Konferencën e Punës Ekonomike Qendrore pozicionon vendin si një fuqi stabilizuese dhe një burim pozitiviteti për rimëkëmbjen ekonomike globale. Qasja e shumanshme e Kinës nxit më tej besimin në aftësinë e saj për të lundruar sfidat dhe për të dalë më fort në skenën ekonomike globale.

Në fakt, stabiliteti dhe zhvillimi si dy shtylla parimore dhe kryesore shikohen në konceptin “të themelojmë të renë para se të shembim të vjetrën” që reflekton një filozofi unike të Kinës në qasjen ndaj ekonomisë dhe një përkushtim ndaj konsolidimit të fuqive ekzistuese, ndërsa përafron përherë qasje inovatore.

Qasja kineze ndaj përgjegjësisë globale

Në vitin 2023, Kina dalloi si një aktor kyç në diplomacinë ndërkombëtare dhe përpjekjet e saj ishin të rrënjëzuara në promovimin e një bashkësie me një të ardhme të përbashkët për njerëzimin, duke theksuar prosperitetin e përbashkët dhe një rend ndërkombëtar më të drejtë.

Më 28 dhjetor u mbajt Konferenca Qendrore Vjetore e Punëve të Jashtme, ku Presidenti Xi mbajti një fjalim të rëndësishëm që shpalosi vizionin strategjik të vendit për të ardhmen. Konferenca ofroi një platformë për një shqyrtim të përgjithshëm të politikës së jashtme të Kinës që nga Kongresi i 18-të i Partisë Komuniste Kineze (PKK), duke theksuar udhëtimin e saj transformues drejt një vendi të përgjegjshëm me impakt global.

CFP

Presidenti Xi shqyrtoi sistematikisht ndryshimet historike të dekadës së fundit, duke theksuar autonomi të re të arritur në fushën e diplomacisë dhe nismat që e kanë bërë Kinën një aktor kryesor në skenën botërore. Kina është shndërruar në një vend të madh të përgjegjshëm me një shtim të forcës ndikuese në botë, me aftësi më të madhe për të nxitur veprime të reja dhe me më shumë forcë tërheqëse në aspektin moral. Një temë kryesore që dallohet nga konferenca është përkushtimi i Kinës për diplomacinë e një vendi kryesor me karakteristika kineze, duke hyrë në një fazë të re ku priten arritje të reja. Presidenti Xi theksoi rëndësinë e pajtimit të përpjekjeve diplomatike me detyrat kryesore të PKK-së dhe të vendit, duke gjetur një ekuilibër mes përparimit dhe stabilitetit ndërsa ruhen me vendosmëri parimet themelore.

Fjalimi i Xi shtriu qasjen e Kinës ndaj çështjeve globale, duke theksuar nevojën për të zënë një pozicion të qartë dhe të fortë për të siguruar cilësinë morale ndërkombëtare. Duke bërë kështu, Kina synon të bashkojë shumicën e komunitetit global, treguar përkushtim ndaj zhvillimit paqësor dhe promovuar stabilitetin dhe prosperitetin global.

Një aspekt kyç i strategjisë diplomatike të Kinës, theksuar nga Presidenti Xi, është koncepti i ndërtimit të një bashkësie me një të ardhme të përbashkët për njerëzimin. Kjo reflekton mendësinë mbi diplomacinë dhe përmbledh vlerat dhe aspiratat e Kinës për qytetërimin global. Qëllimi është ndërtimi i një bote të hapur, të përfshirë, të pastër dhe të bukur, e karakterizuar nga paqja e qëndrueshme, siguria universale dhe prosperiteti i përbashkët.

CFP

Vizioni i Kinës për qeverisjen globale përfshin konsultim të gjerë, kontribut të përbashkët dhe vlera të përbashkëta, duke promovuar një lloj të ri të marrëdhënieve ndërkombëtare. Udhëzimet strategjike për këtë vizion vijnë nga zbatimi i nismave globale të lançuara nga Kina, si “Një brez, një rrugë”, Nisma e Zhvillimit Global, Nisma e Sigurisë Globale, etj. Nismat e Kinës për Afrikën, botën Arabe dhe Amerikën Latine, përfshirë planet për industrializimin dhe modernizimin e bujqësisë në Afrikë, demonstroi një përkushtim për të nxitur zhvillimin dhe prosperitetin. Një temë qendrore e diplomacisë kineze në vitin 2023 që do të aplikohet edhe në vitin 2024 është zgjidhja e konflikteve nëpërmjet dialogut.

Kina bën thirrje për një botë multipolare ndërsa përkrah globalizimin ekonomik gjithëpërfshirës duke theksuar përgjegjësinë e shtuar të Kinës si një aktor kryesor në çështjet ndërkombëtare dhe përkushtimin e saj për të promovuar një rend global më gjithëpërfshirës dhe më të balancuar.

Së fundmi, përballë një peizazhi global të tronditur, udhëheqja politike e Kinës ka treguar një përkushtim për të punuar me një vizion strategjik, duke prezantuar politika të favorshme për stabilitetin gjeopolitik në nivelet rajonale, kontinentale dhe globale. Rritja e internacionalizmit të përpjekjeve të Pekinit, me karakter ekonomik dhe diplomatik – nënvizojnë sërish përpjekjet në nivel global për paqe dhe zhvillim.

Burimi: CRI.CN