Saranda, një qytet bregdetar në Shqipëri do të bëhet një nga pikat më të nxehta turistike të Evropës këtë verë, shkruan Megi Canco në revistën amerikane të udhëtimeve “Travel off Path”.

Nëse po planifikoni të eksploroni disa nga vendet më të mrekullueshme në Rivierën Shqiptare këtë verë, ne ju rekomandojmë plazhet më të mira ku të qëndroni.

Ku të akomodoheni?

Disa hotele janë vërtet fantastike në Sarandë (si Hotel Bahamas dhe Santa Quaranta) të cilat ofrojnë shërbime të shkëlqyera me kosto deri në 100 dollarë.

Unë kam qëndruar në apartamente të bukura në qendër të qytetit për vetëm 40 dollarë në natë, por këto zakonisht nuk janë të listuara në faqet e rezervimit dhe gjenden vetëm nëpërmjet të njohurve.

Ku të hani?

Ushqimi në Sarandë megjithëse nuk është diçka novatore, është mjaft i shijshëm. Disa nga vendet më të mira në qytet për të ngrënë janë;

L’arte Della Pizza

Balbi 34

Why Not? – Burger Bar

Restorant Pupi

Oda e Babës

Ku të shkoni në mbrëmje?

Ju keni qenë në plazh, keni ngrënë drekën dhe në mbrëmje jeni të relaksuar, të veshur dhe gati për të dalë.

Nëse jeni duke kërkuar klube nate, Jericho dhe Vamos janë vendet më të mira. Gjatë verës organizohen festa që zhvillohen çdo natë dhe nuk keni nevojë të bëni një rezervim.

Nga ana tjetër, ata që kërkojnë vetëm një natë të qetë me një pije të mirë në dorë mund të shkojnë në një nga vendet e mia të preferuara në qytet – “Noname Cocktail Bar”.

Është një vend i vogël, me ndriçim të dobët që ofron disa nga koktejet më të mira në qytet për më pak se 10 dollarë.

Muzika është fantastike, por jo aq e zhurmshme sa të mos e dëgjosh veten kur je duke folur, dhe është pikërisht në shëtitoren e qytetit, një nga pikat kryesore të Sarandës.

Plazhi më i mirë në Sarandë

Plazhet e para që do të shihni sapo të mbërrini në Sarandë janë ato që ndodhen pranë shëtitores.

Këto quhen “plazhe publike”, por ju do të tarifoheni nëse përdorni shezlongët, megjithëse çmimi është dukshëm më i ulët se ai që do të paguani në plazhet private aty pranë.

Ka edhe zona të vogla dhe të pabanuara ku mund të rrini pa pagesë, por këto janë goxha të vogla dhe shkëmbore.

Eksplorimi i rajonit përtej qytetit kryesor

Saranda është lloji i qytetit që nuk të lë kurrë të mërzitesh, por ka kaq shumë për të parë dhe bërë në fshatrat e afërta, saqë të kalosh gjithë pushimet në qytet, sinqerisht do të ishte një humbje e mundësive.

Plazhin e Pasqyrës e kam dashur që nga dita e parë që e kam shkelur.

Ishte viti 2013, dhe ky ishte plazhi i parë që pashë, kishte shtretër prej druri dhe çadra kashte, toka ishte me guralecë, nuk ishte i mbushur me njerëz, deti ishte i pastër kristal, dhe unë pagova vetëm rreth 7 dollarë për dy shezlonge – ky është një çmim i shkëlqyer për atë që ndihet si parajsa juaj tropikale. Ky çmim ka shkuar deri në 20 dollarë tani.

Në fakt, kjo perlë e fshehur shqiptare njihet si plazhi me ujërat më të kaltra në botë, duke lënë pas vende shumë më të njohura të Evropës.

Plazhe të tjera që nuk duhet t’i humbisni gjatë udhëtimit tuaj në Sarandë përfshijnë Ksamilin, Livadhin, Jalën dhe Dhërmiun.

Për ata që duan të shijojnë diçka përtej plazhit, Syri i Kaltër dhe Parku Kombëtar Arkeologjik i Butrintit nuk duhet humbur.

Vizitoni qytetin e bukur bregdetar, Sarandën – ju garantoj që nuk do të zhgënjeheni!

(Marrë nga ATSH)