Nga Anisa Ymeri

Këto janë ngjarje për të cilat e vërteta s’do të dalë asnjëherë në pah, por çfarëdo të zbulohet nga kjo histori, kushdo të shpallet “fajtor”, unë kam disa pyetje, përgjigjet e të cilave na fajësojnë të gjithëve:

– A kishte familje kjo grua? Nëse po, nëna, motra, vëllai, babai, kunata, vjehrri, vjehrra…kishin kuptuar diçka?! Nëse po, a është e mundur të mos reagonin në kohën e duhur? Nëse jo, a mundet të mos kuptosh që diçka shkon keq në jetën e bijëve/të afërmve që i dorëzohen fatalitetit në formën më tragjike të mundshme…?

– A kishin mësues 2 fëmijët e saj të rritur? Nëse po, a është e mundur të mos kishin kuptuar mizerjen në të cilën jetonin e me të cilën përballeshin çdo ditë? E them këtë sepse detyra e një mësuesi nuk është vetëm të mësojë ABC e 1,2,3

– A kishte psikologe në shkollën e tyre? Nëse po, a është e mundur të mos kish kuptuar asgjë kjo profesioniste? Nëse po, a mos duhet që kur kuptohen rastet e dhunës në familje, të referohen edhe gjetkë?

– A kishin shokë / shoqe fëmijët e rritur tashmë të mbytur? Nëse po, a është shqetësuar ndonjëri prej tyre për gjendjen emocionale të shokut e shoqes?

– A kishte fqinj kjo familje? Nëse po, a ka parë ndonjë prej tyre përtej gardhit të oborrit të vet dhe të ngrinte zërin edhe për ata që s’mundeshin?

– A kishte oficer policie zona ku banonin? Nëse po, a kish pikasur ndonjë punonjës i institucioneve, ndonjë sjellje të pazakontë?

– A kishte administratë vendore zona ku banonin? Nëse po, ndonjë prej punonjësve socialë, kish pikasur ndonjë problematikë në këtë familje?

Jemi në KURTH…!!!

Ditën që do të jemi më shumë në numër NE që mendojmë se shqetësimet e familjes ngjitur me tonën, e shokut të bankës, e kushëririt, e motrës dhe vëllait, nuk janë vetëm të tyret dhe do të reagojmë kundër çdo akti dhune, atëhere nuk do të na kumbojnë veshët e s’do të na gufojë zemra nga tragjedi të tilla.

Jemi vërtet në një KURTH të madh…!!!