Kryeministri Edi Rama deklaroi sot se, gjuha shqipe shumë shpejt do të jetë një gjuhë zyrtare e Bashkimit Evropian, duke iu referuar hapjes së negociatave dhe synimit të pranimit të vendit brenda vitit 2030.

Në fjalën e tij në Kuvendin Kombëtar për gjuhën shqipe, “Sfidat e Gjuhës Shqipe në shekullin XXI” Rama u shpreh se, “sot ky Kuvend Kombëtar i Gjuhës Shqipe, i cili mund të duket modest në formatin e vet, por është përmbajtësor për disa arsye të rëndësishme në përvjetorin e 116-të të ditës së miratimit të Alfabetit të Shqipes në Kongresin e Manastirit, lidhet dhe me një moment jashtëzakonisht të rëndësishëm që është një moment ku shqipja bëhet faktikisht edhe përmes kësaj date të veçantë një përkatësi e përbashkët e gjithëve”.

Rama theksoi se gjuha shqipe do të jetë një ndër gjuhët më të rralla të BE-së.

“Një përkatësi që është e jona, që askush nuk na e heq dot dhe nga nga askush tjetër nuk vjen kërcënimi përveç se nga vetvetja lidhur me këtë përkatësi, por shumë shpejt do të jetë edhe një gjuhë zyrtare e Bashkimit Evropian, ku në mos gjuha më e lashtë e familjes së kombeve evropiane, shqipja me siguri do të rreshtohet ndër më të rrallat dhe më të veçantat e gjuhëve të Bashkimit Evropian”, tha Rama.

(ATSH)