Për vitin 2025, Aeroporti Ndërkombëtar “Nënë Tereza” projekton të presë 12 milionë pasagjerë, ndërsa në maj 2025 do të kalojë në kategorinë 4E si aeroport që plotëson tërësisht standardet.

Zv/kryeministrja Belinda Balluku, njëherësh ministre e Infrastrukturës dhe Energjisë mori pjesë sot në ceremoninë e organizuar në aeroportin e Rinasit me rastin e regjistrimit të pasagjerit të 10-miliontë, ndërsa u shpreh se targeti i ri për vitin 2025 është arritja e 12 milionë pasagjerëve.

Balluku informoi se përgjatë muajit maj 2025, aeroporti ndërkombëtar i Rinasit do të shënojë edhe një hap tjetër përpara duke kaluar në kategorinë 4E.

“Kjo vjen si rezultat i investimeve në lidhje me pistën, vendqëndrimet, pajisjet përpunuese dhe padyshim shërbimin zjarrfikës. Këto janë kritere që të japin mundësinë për të avancuar një kategori më lartë”, tha ajo.

Një tjetër zhvillim me rëndësi që pritet vitin e ardhshëm në fushën e aviacionit civil është edhe hapja e aeroportit të Vlorës.

“Vitin ardhshëm ne presim një zhvillim tjetër që ka të bëjë me konkurrencën në vend. Hapjen e aeroportit ndërkombëtar të Vlorës. Jam e sigurt që do të jetë vetëm një konkurrencë pozitive midis 3 njësive operative në Shqipëri në shërbim të plotë të qytetarëve duke ofruar çmime më të mira për biletat, si dhe më shumë destinacione dhe kompani ajrore në vendin tonë”, tha Balluku.

Sipas saj, aviacioni do të vazhdojë të jetë sektori i së ardhmes.

“Edhe bashkëpunëtorët tanë ndërkombëtarë e vlerësojnë tashmë Shqipërinë si një nga vendet me arritjet më të larta në aviacionin civil. Çdo muaj në tabelën e arritjeve Shqipëria vazhdon të vlerësohet ndër vendet e para qoftë nga Eurocontrol apo entitete të tjera ndërkombëtare që kryejnë monitorimin e aviacionit civil”, tha Balluku.

Por, Balluku vuri theksin te investimi në kapacitete njerëzore, të cilat sipas saj janë shumë të çmuara në këtë sektor.

“Kërkohet staf kompetent dhe i mirëtrajtuar dhe kjo është e vlefshme për të gjithë aeroportet. Për këtë arsye ne kemi ndërmarrë një iniciativë shumë të rëndësishme, krijimin e një akademie që do të adresojë të gjitha nevojat në kohë, pasi dihet sa e vështirë është të ndërtosh një profesionist në aviacionin civil. Kërkohet angazhimi i të gjithë aktorëve për të ndihmuar në këtë aksion që do të krijojë mundësi të reja punësimi dhe drejtimin e karrierës për të gjithë ata që duan të zgjedhin një profesion ndërkombëtar me licencën e të cilit mund të punojnë kudo në botë, por pasi të kenë kontribuar në vendin e tyre”, tha Balluku.

Ajo theksoi se “jemi në fazën përfundimtare të hartimit të paketës ligjore, mënyrës së organizmit të kësaj akademie”.

(ATSH)