Presidenti rus Vladimir Putin do të pajtohej që forcat paqeruajtëse evropiane të sigurojnë një armëpushim të mundshëm në Ukrainë, tha sot presidenti i SHBA Donald Trump duke folur me presidentin francez Emmanuel Macron, i cili ndodhet në Uashington për bisedime.

I pyetur se “a do ta bindni Vladimir Putinin të pranojë trupat evropiane si paqeruajtës?” Trump u përgjigj “po, ai do të pranojë”.

Ata po diskutonin luftën e Rusisë kundër Ukrainës, në një takim që vjen në ditën e tre vjetorit të pushtimit të gjithanshëm të Rusisë dhe disa ditë pasi Trump fajësoi në mënyrë të rreme Ukrainën për fillimin e luftës.

Ai gjithashtu vjen pasi Trump mbajti një telefonatë 90-minutëshe me Putinin – pa pjesëmarrje ukrainase apo evropiane.

Ndërkohë Macron tha se bisedimet ishin duke u zhvilluar për të gjetur një zgjidhje.

“Ne kemi parë angazhimin e ri të SHBA-së dhe mesazhin që i dërgon Putinit, ne kemi parandalim, i cili do të lejojë të ndodhë një armëpushim, verifikimi i atij armëpushimi dhe më pas mund të vendoset një marrëveshje paqeje në mënyrë që të mund të fillojmë rindërtimin e Ukrainës me garanci sigurie”, tha Macron, sipas një përkthyesi të pranishëm.

“Dhe ne kemi një rol për të luajtur në këtë. Përsëri, unë nuk po parandaloj asnjë diskutim, por ne kemi folur për sovranitetin e Ukrainës dhe kjo ka qenë një temë diskutimi midis SHBA-së dhe Ukrainës”, tha ai.

Trump tha gjithashtu se donte të takonte presidentin ukrainas Volodymyr Zelensky këtë javë ose në vijim për të biseduar rreth aksesit të SHBA-së në lëndët e para të Ukrainës.

Trump tha se të dy vendet ishin shumë afër një marrëveshjeje.

Marrëveshja do të lidhte ndihmën e SHBA-së me Ukrainën duke i dhënë akses në burimet e saj të vlefshme dhe strategjike.

”Ne po e ndihmojmë Ukrainën ashtu siç askush nuk e ka ndihmuar ndonjëherë Ukrainën më parë”, tha presidenti amerikan, duke shtuar se ai nuk dëshiron që lufta në Ukrainë të përshkallëzohet në një luftë të tretë botërore./