Kuvendi i Shqipërisë organizoi sot takimin e dytë të nivelit të lartë “Shqipëria 2030 në BE – Rruga e Reformave”.

Kryetarja e Kuvendit, Elisa Spiropali në fjalën e saj në këtë takim u shpreh se, “ngritja e nga Kuvendi i Komisionit të Posaçëm nuk ishte një “rrufe në qiell të kthjellët”, por një imperativ që buroi nga përgjigjja jonë ndaj nevojës së brendshme të shoqërisë shqiptare për t’iu afruar gjithnjë e më shumë idealit të saj, shndërrimit në një shoqëri tërësisht evropiane dhe po ashtu qëllimi strategjik të Kuvendit për t’u shndërruar brenda kësaj dekade, ashtu siç e kemi përcaktuar në planin e ri strategjik, në një parlament me të gjitha parametrat, standardet dhe cilësinë e një parlamenti të një vendi të BE-së”.

Spiropali tha se, “nuk mund të ndërtojmë një Shqipëri evropiane pa një Kuvend evropian dhe një Kuvend mund të funksionojë me standarde evropiane vetëm në një shoqëri që i ka vetë këto standarde”.

“Objektivi ynë për anëtarësimin në familjen evropiane në fund të kësaj dekade dhe mbylljen e negociatave teknike brenda vitit 2027 është bërë tashmë publik, jo vetëm në Shqipëri, por edhe në institucionet evropiane e në vendet anëtare e ka fituar ndër vite e me shumë mund mbështetjen e tyre të plotë”, tha Spiropali.

“Këtë objektiv strategjik e kemi ndarë me presidenten e Parlamentit Evropian, Roberta Metsola, gjatë vizitës në Bruksel në nëntor të vitit të kaluar; Me raportuesin e Parlamentit Evropian për Shqipërinë, Andreas Schieder, gjatë vizitës së tij në Tiranë në muajin janar; Me Komisioneren Evropiane për Zgjerimin, Marta Kos, gjatë vizitës së saj në Tiranë në muajin mars, qëndrim të cilin Komisionerja Kos e artikuloi qartë edhe para pak ditësh; Me kryetarin e Parlamentit të Polonisë dhe kryetaren e Senatit të Polonisë, vendi që gjatë këtij gjashtëmujori mban Presidencën e Këshillit Evropian; Me kryetarin e Dhomës së Përfaqësuesve dhe të Senatit të Holandës; Me mjaft kolegë kryeparlamentarë të vendeve të Bashkimit Evropian, me të cilat jemi takuar kohët e fundit”, tha Spiropali, duke shtuar se këtë objektiv e ka nënvizuar gjithashtu edhe në Konferencën e kryeparlamentarëve të vendeve anëtare të Këshillit të Evropës në muajin mars”.

Spiropali shtoi se, Bashkimi Evropian, si kryefjala e Shqipërisë, e qytetarëve dhe e institucioneve të saj, është bërë tashmë edhe kryefjala e bashkëpunimit me parlamentet e vendeve anëtare.

“Ritmet e shpejta, reformat ndër vite, hapat e vendosur, vizioni i qartë dhe i palëkundur drejt destinacionit evropian, konsensusi i brendshëm politik e Parlamentar, mbështetja e gjerë popullore, po shpërblehen nga institucionet evropiane dhe jam optimiste se kështu po ndodh e do të ndodhë edhe me qëndrimet e vendeve anëtare”, tha jo.

“Vendimi i Parlamentit Evropian për të hapur në Tiranë Zyrën Rajonale për Ballkanin Perëndimor dhe miratimi i para financimit prej 64,5 milionë euro për Shqipërinë, si pjesë e Planit të Rritjes së Ballkanit Perëndimor, janë të tjera shenja që tregojnë rrugën e mbarë, rrugën e duhur drejt reformave suksesshme demokratizuese e integruese, sundimin e ligjit, zhvillimin e qëndrueshëm, rritjen e mirëqenies, forcimin e kohezionit social dhe mbrojtjen e të drejtave të njeriut”, theksoi Spiropali.

Asnjëherë, shtoi kryeparlamentarja, “Shqipëria dhe shqiptarët nuk kanë qenë kaq afër, kaq të qartë, kaq të frymëzuar dhe kaq të vendosur në rrugëtimin e tyre drejt familjes evropiane. Asnjëherë Bashkimi Evropian nuk ka qenë kaq i bindur dhe kaq qartësisht i artikuluar për progresin dhe kaq i vendosur për anëtarësimin e Shqipërisë”.

“Jemi në një momentum historik, të cilin duhet ta shfrytëzojmë dhe po e shfrytëzojmë për ta vendosur, brenda kësaj dekade, yllin e Shqipërisë mes 27 yjeve të Evropës. Prandaj, tashmë që forcat politike kanë zbritur në fushë për zgjedhjet e 11 majit, ta konsiderojmë këtë fushatë zgjedhore si një mundësi për t’iu bashkuar më shpejt familjes sonë të natyrshme evropiane”, tha ajo.

Duke folur për punën e Komisionit të Posaçëm, në të tri shtyllat: Mirëqeverisja, Antikorrupsioni, Sundimi i ligjit, dhe sinergjinë e ndërveprimin midis tyre, Spiropali u shpreh se ka ndjekur me vëmendje të shtuar rekomandimet që lidhen me konsolidimin e institucioneve demokratike në Shqipëri, dhe në këtë kuadër, edhe me forcimin e funksioneve dhe përmirësimin e veprimtarisë së Kuvendit.

“Ju keni bërë një analizë të detajuar të arritjeve të deritanishme të reformave, ndikimit të tyre në forcimin e sistemit demokratik, në vështirësitë që janë ndeshur dhe sfidat që po përballojmë për zhvillimin, demokratizimin dhe integrimin europian të Shqipërisë”, tha Kryeparlamentarja.

“Mirëqeverisja është një standard përparësor i procesit të anëtarësimit. Kuvendi po mbështet, me legjislacion bashkëkohor dhe mbikëqyrje të rreptë parlamentare, qeverisjen e hapur e transparente, rritjen e integritetit në pushtetin legjislativ, ekzekutiv dhe gjyqësor, shmangien e konfliktit të interesit, përmirësimin e cilësisë së shërbimeve publike, digjitalizimin tërësor etj., të cilat rrisin besimin e qytetarëve tek institucionet demokratike dhe janë kushte thelbësore për një Shqipëri evropiane”, tha Spiropali.

Spriopali nënvizoi se, “Kuvendi po forcon mbikëqyrjen, transparencën, pjesëmarrjen gjithëpërfshirëse, llogaridhënien dhe eficiencën, duke kontribuar që Qeverisja e Hapur të synojë ndërveprimin e tri degëve: legjislative, ekzekutive e gjyqësore”.

“Një qeverisje për qytetarët, realizohet në bashkëpunim dhe me mbështetjen e konsensusin e tyre. Qeverisjes transparente e llogaridhënëse i shërben dinamizimi i konsultimit publik, përfshirja në këtë proces e gjithë legjislacionit që shqyrton Kuvendi, monitorimi i zbatimit dhe zgjerimi i pjesëmarrjes në proceset ligjbërëse e vendimmarrëse, përmirësimi i kontrollit dhe transparencës së lobimit, sistemi i integruar e-Legjislacion, rregullimet që lehtësojnë ushtrimin e të drejtës së qytetarëve për peticione etj.”, theksoi ajo.

Spiropali u shpreh se, “Kuvendi do të vijojë të udhëheqë me vendosmëri anëtarësimin në Bashkimin Evropian, duke kontribuar në mënyrë të veçantë në garantimin e legjitimitetit demokratik dhe fuqizimin e tiparit gjithëpërfshirës të procesit. Në këtë kontekst, do të shqyrtojmë propozimin e ekspertëve për ngritjen pranë Kuvendit të këshillave të përhershëm konsultativë për çështje me interes strategjik kombëtar, duke zgjeruar praktikën e funksionimit të Këshillit Kombëtar të Integrimit Evropian”.

“Do të shqyrtojmë po ashtu rekomandimet dhe nevojën për përmirësimin e legjislacionit për çështje thelbësore të zhvillimit, demokratizimit dhe integrimit evropian, modernizimin e Kuvendit të Shqipërisë, bashkëpunimin me institucionet e pavarura dhe fuqizimin e tyre si roje të interesit publik, bashkëpunimin me qytetarët, shoqërinë civile dhe median, rritjen e transparencës së veprimtarisë së Kuvendit, Qeverisë dhe administratës publike”, tha ajo.

Spiropali theksoi se, Kuvendi ka krijuar disa praktika të reja antikorrupsion, siç është Metodologjia për vlerësimin parandalues të korrupsionit, e cila është bërë pjesë e Rregullores së Kuvendit, si një hap i rëndësishëm drejt fuqizimit të integritetit të Kuvendit.

“Mirëpresim rekomandimet për përmirësimin e strukturës së Kuvendit, si një nga rrugët për parandalimin e praktikave korruptive, nëpërmjet masave më eficiente antikorrupsion në të gjithë sektorët dhe në të gjitha nivelet e shoqërisë. Ne po punojmë për fuqizimin e funksionit mbikëqyrës të Kuvendit, shqyrtimin e zbatimit të ligjeve e politikave qeveritare. Metodologjinë e Kontrollit Postlegjislativ do ta shtrijmë në analizën e zbatimit të legjislacionit në të gjitha nivelet”, theksoi Kryetarja e Kuvendit.

Spiroplai u shpreh se, “Kuvendi do të vazhdojë të mbështesë reformën në drejtësi dhe pavarësinë e institucioneve të drejtësisë, harmonizimin e sundimit të ligjit me respektimin e të drejtave kushtetuese dhe të drejtave themelore, si një nga shtyllat e sistemit demokratik, nëpërmjet legjislacionit bashkëkohor dhe kuadrit institucional të përafruar me acquis-në e Bashkimit Evropian për sundimin e ligjit dhe të drejtat e njeriut”.

“Në këtë mbështetje mbajmë parasysh edhe vlerësimet e rekomandimet e Raportit të Komisionit Evropian për Shtetin e së Drejtës, 2024, Raportit për Shqipërinë 2024 dhe pozicionin e përbashkët të Bashkimit Evropian për grup-kapitullin e parë “Themelorët” 2024. Sfida në këtë aspekt është zbatimi i legjislacionit që kemi miratuar dhe garantimi në praktikë i të drejtave të njeriut, sidomos në disa aspekte si mbrojtja e të dhënave personale, mosdiskriminimi, përfundimi i proceseve kalimtare në fushën e të drejtave pronësore etj.”, tha ajo.

“Kuvendi do të vijojë të mbështesë institucionet e pavarura që punojnë në fushën e të drejtave themelore me burimet e nevojshme materiale, financiare e njerëzore, për të shmangur hendekun mes legjislacionit bashkëkohor europian që kemi miratuar dhe kapaciteteve joadekuate të disa institucioneve të pavarura për zbatimin në praktikë të legjislacionit”, u shpreh Spiroplai, teksa shtoi se, “gjithashtu, duhet të gjejmë dhe do të gjejmë rrugëdalje nga polarizimi i lartë dhe gjendjet e entropisë, të cilat i janë imponuar Kuvendit si pasojë e konfliktualitetit politik, i cili ka penguar funksionimin normal të disa institucioneve të pavarura”.

Kuvendi ka inkorporuar dhe është duke inkorporuar mjaft praktika parlamentare të vendeve të Bashkimit Evropian, tha Spiropali.

Në këtë kontekst, shtoi ajo, “do të sugjeroja që, përveç propozimeve të deritanishme që burojnë nga nevojat e brendshme të shoqërisë shqiptare, të përfshihen edhe ide, sugjerime e rekomandime për implementimin në Kuvend edhe të modeleve të parlamenteve të vendeve anëtare të Bashkimit Evropian”.

“E para e të gjithave, dhe në fund të fundit, demokracia është sistemi më i mirë qeverisës, sepse kritikon dhe korrigjon vazhdimisht vetveten”, tha Spiropali.

Kryetarja e Kuvendit falënderoi deputetët, ekspertët e partnerët “për punën e shkëlqyer që keni bërë, duke e kthyer Kuvendin në një kantier pune intensive për korrigjimin e vetvetes, të institucioneve dhe të gjithë shoqërisë, drejt objektivit tonë strategjik kombëtar, Shqipëria 2030 në Bashkimin Evropian”.

Burimi ATSH